ముషీరాబాద్,వెలుగు: కొండా లక్ష్మణ్ బాపూజీ యువతకు ఆదర్శం అని ఎమ్మెల్సీ కోదండరామ్ అన్నారు. బీసీ రాజ్యాధికార సమితి ఆధ్వర్యంలో కొండా లక్ష్మణ్ బాపూజీ వర్ధంతి సందర్భంగా సెప్టెంబర్ 21న జలదృశ్యం వద్ద నిర్వహించే కార్యక్రమ పోస్టర్ ను బుధవారం తార్నాకలోని తన నివాసంలో కోదండరామ్ ఆవిష్కరించారు. మహాత్మా గాంధీ, సుభాష్ చంద్రబోస్ వంటి మహానాయకుల స్ఫూర్తితో బాపూజీ భారత జాతీయోద్యమంలో పాల్గొన్నారని తెలిపారు. తెలంగాణలో సామాజిక న్యాయం కోసం నిరంతరం పోరాడిన మహానాయకుడనీ, ఆయన జీవితం ప్రతి ఒక్కరికి స్ఫూర్తి దాయకమని పేర్కొన్నారు. ఈ కార్యక్రమంలో కొండా లక్ష్మణ్ బాపూజీ వర్ధంతి కమిటీ కన్వీనర్ మారేపల్లి లక్ష్మణ్, కో కన్వీనర్లు శ్రీమాన్ తులసి, బండారు పద్మావతి, నాగమణి ,వరిపల్లి అనిల్ తదితరులు పాల్గొన్నారు.
