న్యూఢిల్లీ: 2027 సీజన్కు ముందే ఐపీఎల్లో భారీ ట్రేడ్ డీల్ కుదిరింది. పంజాబ్ కింగ్స్, ముంబై ఇండియన్స్ మధ్య ప్రతిపాదిత ట్రేడ్ డీల్‌కు బీసీసీఐ ఆమోదం తెలిపింది. ఇరు ఫ్రాంచైజీలు తమ ఆటగాళ్ల మార్పిడికి సంబంధించిన అధికారిక పత్రాలను బీసీసీఐకి సమర్పించగా రెగ్యులేటర్ల నుంచి దీనికి అధికారిక ఆమోదం లభించింది. ఈ ఒప్పందంలో భాగంగా ముంబై కెప్టెన్ హార్దిక్ పాండ్య పంజాబ్ జట్టులోకి వెళ్లనుండగా.. పంజాబ్ స్టార్ బౌలర్ అర్షదీప్ సింగ్ ముంబై టీమ్లోకి రానున్నాడు. హార్ధిక్ పాండ్యకు పంజాబ్ రూ.16.35 కోట్లు చెల్లించనుండగా.. ముంబై అర్షదీప్కు రూ.18 కోట్ల భారీ పారితోషికం ఇవ్వనుంది. ఇరు ఆటగాళ్ల పూర్తి సమ్మతితోనే ఈ ఒప్పందం పూర్తయింది. ఈ ప్లేయర్ల స్వాప్ డీల్‌కు సంబంధించి ముంబై, పంజాబ్ జట్ల నుంచి అధికారిక ప్రకటన రావాల్సి ఉంది.
2024 సీజన్లో ముంబై ఇండియన్స్ కెప్టెన్గా వచ్చాడు హార్దిక్ పాండ్య. అప్పటి కెప్టెన్ రోహిత్ శర్మ స్థానంలో జట్టు బాధ్యతలను చేపట్టాడు. అయితే, ఈ ప్లాన్ బెడిసికొట్టింది. 5 సార్లు ఛాంపియన్ అయిన ముంబై.. హార్ధిక్ సారథ్యంలో రెండు సార్లు కనీసం ప్లే ఆఫ్స్కు కూడా చేరకుండానే ఇంటి బాట పట్టింది. రోహిత్ను కాదని పాండ్యకు కెప్టెన్సీ అప్పగించడంతో ముంబై జట్టులో చీలికలు వచ్చినట్లు ప్రచారం జరిగింది.
జట్టు రెండు వర్గాలుగా చీలిపోయిందని.. కొందరు రోహిత్కు మద్దతు ఉంటే.. ఇంకొందరు పాండ్య వైపు అండగా ఉన్నట్లు వార్తలు వచ్చాయి. ఈ ప్రభావం ముంబై జట్టు ప్రదర్శనపై తీవ్ర ప్రభావం చూపించింది. హార్దిక్ నిర్లక్ష్య పూరిత వైఖరితో టీమ్ నష్టపోయినట్లు ముంబై యాజమాన్యం కూడా భావించిందట. ఈ నేపథ్యంలోనే అతడిని వదులుకున్నట్లు క్రీడా వర్గాల్లో జోరుగా ప్రచారం జరుగుతోంది.
ALSO READ : IPL 2027 మినీ వేలానికి కౌంట్‌డౌన్ స్టార్ట్
మరోవైపు అర్ష్ దీప్ను వదులుకున్న పంజాబ్ డిసిషన్ కూడా అంత ఈజీ కాదు. 2019లో ఐపీఎల్ అరంగేట్రం చేసినప్పటి నుండి పంజాబ్ కింగ్స్‌కు నమ్మకమైన బౌలర్‌గా ఉన్నాడు పేసర్ అర్ష్‌దీప్ సింగ్. తన అద్భుతమైన బౌలింగ్తో ఎన్నో మ్యాచుల్లో పంజాబ్‌కు చిరస్మరణీయ విజయాలు అందించాడు. జట్టులో ప్రధాన బౌలర్‌గా ఉన్న అర్షదీప్ నిష్క్రమణ పంజాబ్‌కు కచ్చితంగా ఎదురు దెబ్బే అనడంలో ఎలాంటి సందేహం లేదు. మరీ అర్ష్ దీప్ స్థానంలో జట్టులోకి వచ్చిన హార్ధిక్ ఎంత వరకు జట్టు అంచనాలను ఫుల్ ఫిల్ చేస్తాడనేది చూడాలి.
