పొంగులేటిని బర్తరఫ్ చేయకుంటే గవర్నర్ కు ఫిర్యాదు చేస్తం : బీఆర్ఎస్ వర్కింగ్ ప్రెసిడెంట్ కేటీఆర్

•     బీఆర్ఎస్ వర్కింగ్​ ప్రెసిడెంట్ కేటీఆర్
•     రాఘవ కన్​స్ట్రక్షన్స్​పై ఎందుకు చర్యలు తీసుకోవడం లేదని ప్రశ్న

హైదరాబాద్, వెలుగు: అక్రమ మైనింగ్​కు పాల్పడిన ఇతర సంస్థలపై చట్టపరమైన చర్యలు తీసుకున్న ప్రభుత్వం.. రాఘవ కన్​స్ట్రక్షన్స్​పై ఎందుకు చర్యలు తీసుకోవడం లేదని బీఆర్ఎస్ వర్కింగ్​ ప్రెసిడెంట్ కేటీఆర్​ ప్రశ్నించారు. మంత్రి కంపెనీ కావడం వల్ల చర్యలు తీసుకోవడం లేదా..? లేదంటే సీఎం పాత్ర ఉందని తీసుకోవడం లేదా? అని నిలదీశారు. పొంగులేటిని మంత్రి పదవి నుంచి వెంటనే బర్తరఫ్​ చేయాలని, లేదంటే గవర్నర్​కు ఫిర్యాదు చేస్తామని హెచ్చరించారు. ఈ మేరకు ఆదివారం గన్​పార్క్​ వద్ద బీఆర్ఎస్ ఎమ్మెల్యేలు నిరసన కార్యక్రమం చేపట్టారు. ఈ సందర్భంగా కేటీఆర్​మాట్లాడుతూ అక్రమాలు జరిగాయని అంగీకరించారని, వాటిని ప్రభుత్వమే బయటపెట్టడంతో ఎదురు దాడి చేస్తున్నారని మండిపడ్డారు. 

రాఘవ కన్​స్ట్రక్షన్స్.. ​మంత్రి పొంగులేటి శ్రీనివాస్ రెడ్డి దూరపు బంధువులదని చెప్పడం హాస్యాస్పదమన్నారు. 2020–22 వరకు ఆయనే దానికి చైర్మన్​గా ఉన్నారని, మంత్రి భార్య, కొడుకు, తమ్ముడికి కంపెనీతో సంబంధం ఉందని ఆరోపించారు. రాఘవ కన్​స్ట్రక్షన్స్​ వ్యవహారంలో సీఎం పాత్ర కూడా ఉన్నట్టు స్పష్టమవుతున్నదని చెప్పారు. కొడంగల్ లిఫ్ట్​ ఇరిగేషన్​ ప్రాజెక్టును ఆ కంపెనీకి అప్పగించడం, రాష్ట్రంలో జరుగుతున్న భూదందాల నేపథ్యంలో మంత్రి, ఆయన అనుచరులపై అనుమానాలు ఉన్నాయని తెలిపారు. 

రెండోసారి నోటీసులిస్తే చట్టప్రకారం ఏడాది జైలు శిక్ష పడుతుందన్నారు. కోకాపేటలో భాగ్యలక్ష్మి మైనింగ్ కంపెనీ కూడా సీఎం బంధువులకు చెందినదేనని చెప్పారు. మైనింగ్​ రెవెన్యూ పెరిగిందని ప్రభుత్వం చెప్తున్నా.. వాస్తవంగా రావాల్సిన రూ.1800 కోట్లలో కేవలం రూ.900 కోట్లే వస్తున్నాయన్నారు. మిగిలిన నిధులు ఎక్కడికి వెళ్తున్నాయని ప్రశ్నించారు. ఈ స్కామ్​లో బీజేపీ సభ్యులు కూడా ప్రభుత్వానికి అనుకూలంగా వ్యవహరిస్తున్నారని ఆరోపించారు. కాగా, రూ.22 వేల కోట్ల మెట్రో ఆస్తిని కేవలం రూ.15 వేల కోట్లకే కొనుగోలు చేశామని చెప్పడం ప్రజలను తప్పుదోవ పట్టించడమేనన్నారు.