మెదక్‌లో ల్యాండ్ పూలింగ్ !

మెదక్‌లో ల్యాండ్ పూలింగ్ !
  • పట్టణ శివారులో 24 ఎకరాల అసైన్డ్​ భూమి గుర్తింపు 
  • జేసీబీ, డోజర్లతో చకచకా చదును

మెదక్, వెలుగు: ఆదాయం సమకూర్చుకునేందుకు హైదరాబాద్​ చుట్టుపక్కల, ఔటర్​రింగ్ ​రోడ్డు, కొత్తగా నిర్మించనున్న రీజినల్​ రింగ్​ రోడ్డు సమీపంలో అసైన్డ్​ భూములు సేకరించి ప్లాట్లు విక్రయించేందుకు ల్యాండ్​ పూలింగ్​ స్కీం అమలు చేస్తున్న రాష్ట్ర ప్రభుత్వం ఇప్పుడు దాన్ని జిల్లాలకూ విస్తరిస్తోంది. మున్సిపల్ పరిధిలో ల్యాండ్ పూలింగ్ కింద అసైన్డ్​ భూములు సేకరించి ప్లాట్లు చేసి అమ్మేందుకు ప్లాన్​ చేస్తోంది. దీని కోసం ఒక్కో మున్సిపాలిటీ పరిధిలో 20 నుంచి 25 ఎకరాల విస్తీర్ణంలో లే అవుట్​ చేయాలని నిర్ణయించింది.

మెదక్ జిల్లాలో ఇంతకు ముందు ప్రతిపాదించిన  రీజినల్ ​రింగ్ ​రోడ్డు వెళ్లే తూప్రాన్ మండలంలోని వివిధ గ్రామాల పరిధిలో ప్రభుత్వం ల్యాండ్​ పూలింగ్ ​ద్వారా అసైన్డ్ భూముల సేకరణ ప్రక్రియ మొదలు పెట్టింది. శివ్వంపేట మండలంలోనూ పలు గ్రామాల పరిధిలో భూముల సర్వే చేసింది. ఇప్పుడు జిల్లా కేంద్రమైన మెదక్ పట్టణ శివారులో ల్యాండ్ పూలింగ్​స్కీం అమలు చేయాలని నిర్ణయించింది. ఈ మేరకు రెవెన్యూ ఆఫీసర్లు మెదక్–చేగుంట మెయిన్ రోడ్డు వెంట ఎంసీహెచ్ హాస్పిటల్ కు వెళ్లే దారికి ఎదురుగా ఉన్న 14 మంది రైతులకు చెందిన 24 ఎకరాల అసైన్డ్​ భూమిని సేకరించేందుకు రంగం సిద్ధం చేసింది. సర్వే కూడా పూర్తి చేసిన అధికారులు, ప్రస్తుతం ల్యాండ్ లెవలింగ్ పనులు చేయిస్తున్నారు.

జేసీబీలు, డోజర్లతో వర్క్స్​ ముమ్మరంగా సాగుతున్నాయి. అక్కడ రోడ్లు వేసి, మౌలిక వసతులు కల్పించి, మొత్తం భూమిలో స్కూల్, పార్క్​, టెంపుల్​ వంటి సామాజిక అవసరాల కోసం 10 శాతం స్థలాన్ని కేటాయించి, ప్లాట్లు విక్రయించనున్నారు. కాగా, ల్యాండ్​ పూలింగ్ ​కింద సేకరించిన భూమిలో గతంలో పట్టా పొందిన అసైనీలకు డెవలప్​ చేసిన వెంచర్​ లో ఎకరాకు 500 నుండి 600 గజాల స్థలం చొప్పున ఇవ్వనున్నట్టు తెలిసింది.