ఇస్లామాబాద్: నిత్యం భారత్పై విషం చిమ్ముతూ, తప్పుడు ఆరోపణలతో వార్తల్లో నిలిచే పాకిస్తాన్ ఫస్ట్ టైమ్ నిజం ఒప్పుకుంది. పహల్గాం ఉగ్రవాడికి ప్రతీకారంగా ఇండియా చేపట్టిన ఆపరేషన్ సిందూర్లో తమ దేశానికి నష్టం వాటిల్లినట్లు పాక్ బహిరంగంగా అంగీకరించింది. ఈ మేరకు పాకిస్తాన్ ఉప ప్రధాని, విదేశాంగ మంత్రి ఇషాక్ దార్ విలేకరుల సమావేశంలో మాట్లాడుతూ.. ఆపరేషన్ సింధూర్లో భాగంగా రావల్పిండిలోని నూర్ ఖాన్ వైమానిక స్థావరంపై భారత క్షిపణులు దాడి చేశాయని.. ఈ దాడిలో ఎయిర్ బేస్ దెబ్బతినడంతో పాటు పలువురు సిబ్బంది గాయపడ్డారని అంగీకరించారు.
ఘర్షణ సమయంలో 36 గంటల్లో ఇండియా కనీసం 80 డ్రోన్లతో దాడులకు ప్రయత్నించిందని.. అందులో 79 డ్రోన్లు కూల్చివేశామని చెప్పారు. ఒక డ్రోన్ నూర్ ఖాన్ ఎయిర్ బేస్పై దాడి చేసిందని ధృవీకరించారు. తమ ఎయిర్ బేస్పై దాడి చేయడం ద్వారా ఇండియా పెద్ద తప్పు చేసిందని నీతులు వల్లించారు. భారత దాడులను ఎప్పుడూ తిరస్కరించే పాకిస్తాన్ ఫస్ట్ టైమ్ బహిరంగంగా అంగీకరించడం చర్చనీయాంశంగా మారింది. ఈ అంగీకారం ఒక రకంగా ప్రపంచ దేశాల ముందు పాకిస్తాన్ పరువు పొగొట్టుకున్నట్లైంది.
జమ్మూ కాశ్మీర్లోని పహల్గాంలో 2025, ఏప్రిల్ 22న పాక్ ప్రేరేపిత ఉగ్రవాదులు మారణహోమం సృష్టించిన విషయం తెలిసిందే. పహల్గాంలోని పచ్చని ప్రకృతి అందాలు తిలకిద్దామని వచ్చిన పర్యాటకులపై పాక్ ఉగ్రమూకలు బుల్లెట్ల వర్షం కురిపించారు. ఈ టెర్రర్ ఎటాక్లో మొత్తం 26 మంది ప్రాణాలు కోల్పోయారు.
ఈ క్రమంలో ఉగ్రవాదాన్ని పెంచిపోషిస్తోన్న పాకిస్థాన్కు తగిన బుద్ధి చెప్పేందుకు ఇండియా సంచలన నిర్ణయం తీసుకుంది. పాకిస్తాన్, పీవోకేలోని ఉగ్రవాద స్థావరాలను నేలమట్టం చేసేందుకు 2025, మే 10న ఆపరేషన్ సిందూర్ చేపట్టింది. ఈ ఆపరేషన్లో భాగంగా పాక్ భూభాగంలోకి చొచ్చుకెళ్లి మరీ భారత సైన్యం దాడులు చేసి ఉగ్రవాద శిబిరాలను ధ్వంసం చేసింది.
