హనుమకొండ, వెలుగు: ఏపీ–-ఒడిశా బార్డర్ నుంచి తెలంగాణకు పెద్ద మొత్తంలో గంజాయి అక్రమంగా రవాణా అవుతోంది. కొంతమంది ముఠాలుగా ఏర్పడి వైజాగ్, సీలేరు, మోతుగూడెం ప్రాంతాల నుంచి తక్కువ ధరకు గంజాయి తీసుకొచ్చి ఇక్కడ బిజినెస్ చేస్తున్నారు. ఎక్కడికక్కడ స్థావరాలు ఏర్పాటు చేసుకుని గుట్టుగా దందా సాగిస్తున్నారు. ఏపీ నుంచి తెలంగాణ వచ్చే మార్గంలో వరంగల్సెంటర్ పాయింట్ గా ఉండటంతో ఇక్కడి నుంచే దందా ఎక్కువగా చేస్తున్నారు. ఇలా ఏపీ నుంచి గంజాయి స్మగ్లింగ్ చేస్తున్న మూడు వేర్వేరు గ్యాంగులను వరంగల్ పోలీసులు అరెస్ట్చేశారు. మూడు ముఠాలకు సంబంధించిన 11 మందిని అదుపులోకి తీసుకుని వారి నుంచి 32 లక్షల విలువైన 318 కిలోల గంజాయిని స్వాధీనం చేసుకున్నారు. రెండు, కార్లు, మూడు ఆటోలు, 11 సెల్ ఫోన్లు సీజ్ చేశారు. ఈ వేర్వేరు ఘటనలకు సంబంధించిన వివరాలను వరంగల్ సీపీ డా.తరుణ్ జోషి గురువారం వెల్లడించారు.
మూడు గ్యాంగుల అరెస్టు
ఏపీలోని తూర్పు గోదావరి జిల్లా కేంద్రానికి చెందిన బోరం సాయికుమార్, గాటంపల్లి వెంకట్, గోదవర్తి శేషుకుమార్ ఆంధ్రప్రదేశ్, ఒడిశా బార్డర్లోని సీలేరు, మోతుగూడెం ప్రాంతాల్లో తక్కువ ధరకు గంజాయి కొని విశాఖపట్నం నుంచి రాజమండ్రి, భద్రాచలం, కొత్తగూడెం, ఖమ్మం పట్టణాల మీదుగా మొదట వరంగల్ నగరానికి చేరవేసేవారు. ఇక్కడి నుంచి వివిధ ప్రాంతాలకు తరలిస్తున్నారు. బుధవారం వరంగల్కు కారులో గంజాయి తీసుకొస్తుండగా టాస్క్ఫోర్స్పోలీసులకు సమాచారం అందింది. దీంతో వర్ధన్నపేట పోలీసులతో కలిసి వరంగల్-ఖమ్మం జాతీయ రహదారిపై డీసీ తండా వద్ద పట్టుకున్నారు. 128 కిలోల గంజాయిని స్వాధీనం చేసుకున్నారు.
* మహబూబాబాద్జిల్లా కేంద్రానికి చెందిన భూక్య రాములు, షేక్ ఖలీల్, కరీంనగర్కు చెందిన కోనమల్ల సునీల్ఏపీలోని వైజాగ్నుంచి గంజాయి తీసుకొస్తుండగా నల్లబెల్లి మండలం రామతీర్థం గ్రామశివారులో అరెస్ట్ చేశారు. కారు, ఆటో స్వాధీనం చేసుకుని 134 కిలోల గంజాయిని సీజ్ చేశారు.
* భద్రాద్రి కొత్తగూడెం జిల్లా సారపాకకు చెందిన బత్ర నరేశ్, తూముల క్రాంతి కుమార్, తుమ్మల నాగరాజు, జి.మనోజ్, మారంపూడి శ్రీను నర్సంపేట మీదుగా వరంగల్ తీసుకొస్తుండగా ఖానాపురం పోలీసులు పట్టుకున్నారు. రెండు ఆటోల్లో తరలిస్తున్న 56 కిలోల గంజాయిని స్వాధీనం చేసుకున్నారు.
వరంగల్ కేంద్రంగా దందా
ఏపీ, ఒడిశా బార్డర్ నుంచి తెలంగాణకు వస్తున్న గంజాయి దందాకు వరంగల్ కేంద్రంగా మారింది. సిటీలో కొన్నిచోట్ల స్థావరాలు ఏర్పాటు చేసుకున్న గంజాయి స్మగ్లర్లు ముందుగా సరుకుని ఆ అడ్డాలకు చేరవేస్తున్నారు. అక్కడ స్టోర్చేసి డిమాండ్ను బట్టి ఇతర ప్రాంతాలకు పంపిస్తున్నారు. ముఖ్యంగా వరంగల్, కాజీపేట రైల్వే ట్రాకులు, బస్టాండ్లు, వరంగల్ రైల్వే క్వార్టర్లు, ఖిలా వరంగల్, శివనగర్, కాశీబుగ్గ, ఆరెపల్లి, ఎర్రగట్టుగుట్ట తదితర ప్రాంతాలు గంజాయి స్మగ్లింగ్కు ప్రధాన స్థావరాలుగా మారాయి. ముఠాలుగా ఏర్పడిన దుండగులు యూత్, స్టూడెంట్స్కు అలవాటు చేస్తుండటంతో క్రైం రేట్ పెరుగుతోందనే వాదనలు వినిపిస్తున్నాయి.
కేసులు పెడుతున్నా అంతే
గంజాయి కేసుల్లో పట్టుబడుతున్నవారంతా ఎంతోకొంత చదువుకున్నోళ్లే ఉంటున్నారు. ఇప్పుడు పోలీసులు అరెస్ట్ చేసిన 11 మంది కూడా కనీసం ఇంటర్చదివిన వాళ్లే కావడం గమనార్హం. వారంతా జల్సాలు, ఈజీ మనీకి అలవాటు పడి గంజాయి స్మగ్లింగ్కు పాల్పడుతున్నట్లు పోలీసులు చెబుతున్నారు. గంజాయి దందాలో లాభాలు బాగా వస్తుండటంతో నిందితులు దీనినే జీవనాధారంగా మార్చుకుంటున్నారు. స్మగ్లింగ్ చేస్తూ పోలీసులకు చిక్కి శిక్ష అనుభవించినా పద్ధతి మార్చుకోవడం లేదు. వర్ధన్నపేటలో దొరికిన గ్యాంగ్ పై ఇదివరకు కూడా గంజాయి స్మగ్లింగ్ కేసు ఉంది. ఇప్పుడు మరోసారి అదే రీతిలో పట్టుబడ్డారు. ఇలా రిపీటెడ్గా నేరాలకు పాల్పడుతున్న దాదాపు 10 మంది స్మగర్లపై వరంగల్ పోలీసులు పీడీ యాక్టు నమోదు చేశారు. అయినా చాలామంది వాటిని లైట్ తీసుకుని యథేచ్ఛగా గంజాయి దందా సాగిస్తున్నారు. ఇలా తరచూ నేరాలకు పాల్పడుతున్న వారిపై సీరియస్యాక్షన్ తీసుకుంటేనే గంజాయి దందాకు అడ్డుకట్టే వేసే అవకాశం ఉందనే అభిప్రాయాలు వ్యక్తమవుతున్నాయి.
