న్యూఢిల్లీ: వచ్చే ఏడాది జరగనున్న లోక్ సభ ఎన్నికల్లో బీజేపీని ఉమ్మడిగా ఎదుర్కొనేందుకు ప్రతిపక్షాలు ప్రణాళిక సిద్ధం చేసుకుంటున్నాయి. దీనిపై చర్చించేందుకు ఇప్పటికే బీహార్ లోని పాట్నాలో మొదటి మీటింగ్ నిర్వహించగా, ఇప్పుడు రెండో మీటింగ్ కు సిద్ధమయ్యాయి. ఈసారి కాంగ్రెస్ ఆధ్వర్యంలో ఈ నెల 17, 18 తేదీల్లో బెంగళూర్ లో ప్రతిపక్షాల సమావేశం జరగనుంది. ఈ మీటింగ్కు రావాలని 24 పార్టీలకు కాంగ్రెస్ చీఫ్ మల్లికార్జున ఖర్గే ఆహ్వానం పంపారు. ‘‘మన మొదటి మీటింగ్ విజయవంతమైంది. అందులో దేశం ఎదుర్కొంటున్న ముఖ్యమైన సమస్యలపై చర్చించాం. వచ్చే ఎన్నికల్లో ఉమ్మడిగా పోటీ చేయాలని ఏకగ్రీవంగా నిర్ణయం తీసుకున్నాం. ఇప్పుడు ఈ చర్చలను కొనసాగించాల్సిన అవసరం ఉంది” అని ఆయన ఆయా పార్టీలకు రాసిన లెటర్ లో పేర్కొన్నారు. ఈ సమావేశానికి సోనియాగాంధీ, రాహుల్ గాంధీ కూడా హాజరుకానున్నారు. 17న రాత్రి ప్రతిపక్ష నేతలకు ఆమె డిన్నర్ ఇవ్వనున్నారని తెలిసింది. ఉమ్మడి కూటమికి పేరు ఖరారు చేయడంతో పాటు కోఆర్డినేటర్ను కూడా ఎన్నుకునే అవకాశం ఉందని తెలిపాయి. కాగా, బీహార్ సీఎం నితీశ్ కుమార్ ఆధ్వర్యంలో జరిగిన ఫస్ట్ మీటింగ్ కు 15 పార్టీలు హాజరుకాగా, ఫ్యామిలీ ఫంక్షన్ కారణంగా ఆర్ఎల్డీ చీఫ్ జయంత్ చౌదరి హాజరుకాలేదు. ఇక ఈసారి కొత్తగా 8 పార్టీలకు ఆహ్వానం పంపించారు.
ఆప్ హాజరైతదా?
బెంగళూర్ లో జరగనున్న మీటింగ్ కు హాజరుకావాలని ఆమ్ ఆద్మీ పార్టీకి కూడా కాంగ్రెస్ ఆహ్వానం పంపింది. అయితే ఆప్ హాజరవుతుందా? లేదా? అనేది చర్చనీయాంశంగా మారింది. పాట్నా మీటింగ్లో గొడవ నేపథ్యంలో ఆప్ చీఫ్ అర్వింద్ కేజ్రీవాల్ హాజరవడంపై సందేహం నెలకొంది.
