- అధికారులు వారికే వత్తాసు పలుకుతున్నరు: బక్క జడ్సన్
- చెరువుల బఫర్ జోన్లను గుర్తించాలని సీఎస్కు విజ్ఞప్తి
హైదరాబాద్, వెలుగు: ప్రభుత్వ నిబంధనల ప్రకారం 25 ఎకరాలలోపు విస్తీర్ణం ఉన్న చెరువులకు 9 మీటర్లు, 25 ఎకరాల కన్నా ఎక్కువుండే చెరువులకు 30 మీటర్ల వరకు బఫర్ జోన్ ఉండాలని, ఆ భూముల్లో ఎలాంటి నిర్మాణాలకు అనుమతివ్వొద్దని కాంగ్రెస్ నేత, ఏఐసీసీ సభ్యుడు బక్క జడ్సన్ అన్నారు. కానీ, అధికార పార్టీ నేతల అండతో రియల్టర్లు, బిల్డర్లు చెరువులను పూడ్చేసి వెంచర్లు వేస్తున్నారని ఆరోపించారు.
కాబట్టి రాష్ట్రంలోని అన్ని చెరువులు, నీటి వనరుల బఫర్ జోన్లను గుర్తించి నోటిఫై చేయాలని మంగళవారం ఆయన సీఎస్ శాంతికుమారికి వినతి పత్రం ఇచ్చారు. అధికారులు కూడా అక్రమార్కులకే వత్తాసు పలుకుతున్నారన్నారువరంగల్ నగరం చుట్టుపక్కల కాకతీయులు 202 గొలుసుకట్టు చెరువులు కట్టారని, కానీ, వాటిని అధికార పార్టీ ఎమ్మెల్యేలు, వారి అనుచరులు కబ్జా చేస్తున్నారని ఆరోపించారు. ఇప్పటిదాకా 52 చెరువులు, కుంటలను మాయం చేశారన్నారు.
ఎర్రబెల్లిపై మానవ హక్కుల కమిషన్కు ఫిర్యాదు
మంత్రి ఎర్రబెల్లి దయాకర్ రావుపై జాతీయ మానవ హక్కుల కమిషన్కు జడ్సన్ ఫిర్యాదు చేశారు. ఏప్రిల్ 3న పత్తిపాకలో జరిగిన పల్లె ప్రగతి కార్యక్రమంలో.. గ్రామ పంచాయతీలు ఖాళీ మందు బాటిళ్లను సేకరించి ఆదాయం పెంచుకోవాలని మంత్రి మాట్లాడారని ఫిర్యాదులో పేర్కొన్నారు.