ఇంట్లో గోడలపై బల్లులు పాకుతుంటేనే చూసి భయపడేవాళ్లు కొందరుంటారు. ఆ బల్లిని తాకాలంటే ఛీ అనుకునే వాళ్లు, పొరబాటున అదే పైన పడితే దోషమని మూఢ నమ్మకాలు ఉండేవాళ్లకు కొదవే ఉండదు. అలాంటిది ఓ వ్యక్తి ఏకంగా బల్లిని పట్టుకుని, నీళ్లలో పడి ఊపిరాడని మనుషులకు చేసినట్లు సీపీఆర్ చేసి.. దాని నోట్లో నోరు పెట్టి.. గాలి ఊది ప్రాణాలు కాపాడాడు. ఈ ఘటన ఆస్ట్రేలియాలోని న్యూసౌత్ వేల్స్‌లో జరిగింది.
కోడిండి బీచ్ ప్రాంతంలోని ఓ పబ్‌లో ఒక వృద్ధుడు బీర్ తాగుతూ ఎంజాయ్ చేస్తున్నాడు. ఆ సమయంలో ఆయన బీర్ జగ్గులో ఓ బల్లి పడింది. దాన్ని చూసి ముందుగా ఆయన దాన్ని రబ్బర్ బల్లి అనుకున్నాడు. ఆటపట్టించడానికి ఫ్రెండ్స్ అందులో వేశారని భావించాడు. కానీ అది గిలగిలా కొట్టుకోవడం చూసి నిజమైన బల్లే అని గుర్తించి.. చేత్తో బయటకి తీశాడు. ఆ బల్లిలో కదలిక లేకపోవడంతో దాన్ని బల్లపై పెట్టి.. పొట్టపై నొక్కి బీరు కక్కించాడు. ఆ తర్వాత గుండెపై తడుతూ సీపీఆర్ చేసి.. బల్లి నోట్లో నోరు పెట్టి గాలి ఊదాడు. దీంతో దాని ప్రాణం లేచి వచ్చింది. ఆ వృద్ధుడి చేతులపైనే కదులుతూ ఆడుకో సాగింది. భయపడి పారిపోవడం మానేసి ఆయన చొక్కపై పాకుతూ ఉండిపోయింది. అది ఆయనకి మంచి ఫ్రెండ్‌లా మచ్చిక కావడంతో దాన్ని తనతో పాటు ఇంటికి తీసుకెళ్లాడు. దీనికి సంబంధించిన వీడియో ఇంటర్నెట్‌లో వైరల్ అవుతోంది.
