ఎలుకలను పట్టుకోవడానికి జిగురు ఉచ్చుల అమ్మకం, ఉత్పత్తి, వాడకాన్ని నిషేధిస్తూ మహారాష్ట్ర ప్రభుత్వం ఇటీవల తీసుకున్న నిర్ణయాన్ని జంతు హక్కుల సంస్థ, పెటా ఇండియా ప్రశంసించింది. జంతువులను పట్టుకోవడానికి ఉపయోగించే ఈ అమానవీయ ఉచ్చులు దీర్ఘకాల బాధను కలిగిస్తాయి. అందులో చిక్కుకుని చాలా రోజులు ఆకలితో అలమటించి, బాధాకరమైన మరణానికి గురవుతాయి. ఇందులో కేవలం ఎలుకలు మాత్రమే కాకుండా పక్షులు, గబ్బిలాలు, పాములు, ఉడుతలు లాంటి ఇతర జంతువులూ ఉంటాయి.
ALSO READ : రశ్మికనే కావాలంటున్న విజయ్.. VD12 నుంచి శ్రీలీల ఔట్..!
జిగురుతో కూడిన ఈ వస్తువులు సాధారణంగా ప్లాస్టిక్ ట్రేలు లేదా కార్డ్‌బోర్డ్ షీట్‌లపై అంటుకునే పూతతో నిర్మించబడతాయి. ఇవి విచక్షణారహిత కిల్లర్లు. వీటిని ఉపయోగించడం అంటే స్థానిక జాతులను సంరక్షించే వన్యప్రాణుల (రక్షణ) చట్టం, 1972ని ఉల్లంఘించడమే. ఈ పరికరాలలో చిక్కుకున్న జంతువులు ఊపిరాడక, అవయవాలను కోల్పోవచ్చు, ఆకలితో చనిపోతాయి.
ఈ సమస్యపై స్పందించిన పెటా ఇండియా.. కీలక పాత్ర పోషించింది. ఈ ఉచ్చులపై నిషేధం అమలు చేయాలని అధికారులను ఆదేశిస్తూ మహారాష్ట్ర పశుసంవర్ధక కమిషనరేట్ ఇటీవల సర్క్యులర్ జారీ చేసిందని వారు వెల్లడించారు. యానిమల్ వెల్ఫేర్ బోర్డ్ ఆఫ్ ఇండియా (AWBI) సలహాను ఈ సర్క్యులర్ ఉదహరించింది. జిగురు ఉచ్చుల వాడకం జంతువులపై క్రూరత్వ నిరోధక చట్టం, 1960లోని సెక్షన్ 11ని ఉల్లంఘిస్తుందని నొక్కి చెప్పింది.
ఎలుకల నియంత్రణకు మానవీయ విధానం ఆచరించాలని పెటా ఇండియా వాదిస్తోంది. ఆహార వనరులను తొలగించడం, ఎంట్రీ పాయింట్‌లను మూసివేయడం, కేజ్ ట్రాప్‌లను ఉపయోగించడం ద్వారా ఎలుకలను బంధించవచ్చు. ఇలా పట్టుకున్న ఎలుకలను వాటి మనుగడను నిర్ధారించడానికి ఆహారం, నీరు, ఆశ్రయం లభించే ప్రదేశాలలో విడుదల చేయాలని పెటా చెబుతోంది.
