ముంబై: సొంత వెహికల్ లేని వారు ఓలా, ర్యాపిడో, ఉబెర్ వంటి ప్రైవేట్ ట్రాన్స్పోర్టును ఆశ్రయిస్తుంటారు. త్వరగా గమ్యం చేరుకోవడంతో పాటు.. కంఫర్టబుల్ ప్రయాణం చేయొచ్చనే ఉద్దేశంతో చాలా మంది బస్సు, మెట్రో వంటివి కాకుండా వీటిని ఉపయోగిస్తుంటారు. అయితే.. అనివార్య కారణాల వల్ల కొన్నిసార్లు మనం బుక్ చేసుకున్న రైడ్ను క్యాన్సిల్ చేస్తే ఆయా సంస్థలు కస్టమర్ల నుంచి ముక్కు పిండి క్యాన్సలేషన్ ఫీజులు వసూల్ చేస్తాయి. ఇదే క్రమంలో కొన్నిసార్లు ఆయా కంపెనీలు, డ్రైవర్లు కూడా ఆర్డర్లను క్యాన్సిల్ చేస్తుంటారు.
దీనికి మాత్రం ఎలాంటి క్యాన్సలేషన్ ఫీజు ఉండదు. బోనస్గా కస్టమర్ల సమయం వృధా అవుతోంది. ఇటీవల ఇలాంటి ఫిర్యాదులు ఎక్కువ కావడంతో మహారాష్ట్ర ప్రభుత్వం కీలక నిర్ణయం తీసుకుంది. ఓలా, ర్యాపిడో, ఉబెర్ వంటి ప్రైవేట్ ట్రాన్స్పోర్టు సంస్థలకు కొత్త నిబంధనలు తీసుకొచ్చింది. ఈ కొత్త రూల్స్ ప్రకారం.. కస్టమర్లు రైడ్ క్యాన్సిల్ చేస్తే వారి వద్ద నుంచి ఎలాగైతే క్యాన్సలేషన్ ఫీజు వసూల్ చేస్తున్నారో.. ఇకపై ఆయా కంపెనీలు లేదా ట్రాన్స్పోర్టు సంస్థల డ్రైవర్లు కన్ఫార్మ్ అయినా రైడ్ క్యాన్సిల్ కస్టమర్లకు క్యాన్సలేషన్ ఫీజు చెల్లించాలి.
కస్టమర్ల విలువైన సమయం వృధా చేసినందుకు దానికి తగిన పరిహారం కస్టమర్కు చెల్లించాలని రూల్ తీసుకొచ్చింది. ఈ రూల్ వల్ల ఇకపై రైడర్లు ఇష్టారీతిన రైడ్లను క్యాన్సిల్ చేయరని.. తద్వారా ప్రయాణికులకు మెరుగైన సేవలు అందుతాయని ప్రభుత్వం భావిస్తోంది. ఈ నిర్ణయం పట్ల ఓలా, ఉబెర్, ర్యాపిడో వినియోగదారులు హర్షం వ్యక్తం చేస్తున్నారు. కస్టమర్ల నుంచి క్యాన్సలేషన్ ఫీజులు వసూల్ చేసినప్పుడు.. అదే మాదిరిగా కంపెనీలు కూడా ఫైన్ చెల్లించాలని.. అందరికే ఒకే రూల్ ఉండాలని కామెంట్లు చేస్తున్నారు.
