మేడిపల్లి, వెలుగు: బోడుప్పల్లోని ఓ కార్పొరేటర్ కారుకు సోమవారం మంత్రి మల్లారెడ్డి పేరుతో ఎమ్మెల్యే స్టిక్కర్ కనిపించింది. ఇటీవల క్యాసినో కేసులో నిందితుల కార్లకు మంత్రి మల్లారెడ్డి పేరుతో ఎమ్మెల్యే స్టిక్కర్ ఉండటం వివాదంగా మారిన విషయం తెలిసిందే. వాడి పడేసిన స్టిక్కర్ను ఎవరో అతికించుకుంటే తనకెలా తెలుస్తుందని మల్లారెడ్డి ఆ సమయంలో వివరణ ఇచ్చారు. తాజాగా
బోడుప్పల్ కార్పొరేషన్ ఒకటో డివిజన్ కార్పొరేటర్ బింగి జంగయ్య కారుకు కూడా (టీఎస్ 08ఎఫ్ వి 1116) మంత్రి మల్లారెడ్డికి పేరుతో ఎమ్మెల్యే స్టిక్కర్ ఉండటం చర్చనీయాంశంగా మారింది.
మల్లారెడ్డే స్టిక్కర్ను ఇచ్చారా ? లేక జిరాక్స్ కాపీ అతికించారా అనే చర్చ జరుగుతోంది. తన దగ్గర 3 స్టిక్కర్లు ఉండగా.. వాటిని కుటుంబసభ్యుల కార్లకు మాత్రమే వాడుతున్నానని గతంలో మల్లారెడ్డి చెప్పారు.కానీ ప్రస్తుతం కార్పొరేటర్ కారుకు ఎమ్మెల్యే స్టిక్కర్ ఎలా ఉందనేది తెలియాల్సి ఉంది. ఈ స్టిక్కర్ కేవలం ఎమ్మెల్యేల వెహికల్స్ కు మాత్రమే వాడాలనే రూల్ ఉన్నప్పటికీ ఇలా దుర్వినియోగం కావడమేంటని పలువురు ప్రశ్నిస్తున్నారు.
