- అప్పటి దాకా అరెస్టులు, ఎన్కౌంటర్లు ఆపాలి
- ఇది సంఘర్షణకు సమయం కాదని వెల్లడి
- ఎంఎంసీ జోన్ ప్రతినిధి అనంత్ పేరుతో లెటర్
- ప్రభుత్వంతో చర్చలకు సహకరించాలని ప్రజాప్రతినిధులు, జర్నలిస్టులకు విజ్ఞప్తి
- దండకారణ్యం స్పెషల్ జోనల్ కమిటీ కార్యదర్శి వికల్ప్ పేరిట మరో లేఖ
- దేవ్జీ సహా 50 మంది మావోయిస్టుల అరెస్టు చూపాలని డిమాండ్
హైదరాబాద్/ భద్రాచలం, వెలుగు: జనవరి 1న సాయుధ పోరాటాన్ని విరమిస్తామని మావోయిస్టు పార్టీ ప్రకటించింది. ఇది సంఘర్షణకు సమయం కాదని వెల్లడించింది. ప్రభుత్వంతో చర్చలు, సమన్వయం కోసం తమ రేడియో ఓపెన్ ఫ్రీక్వెన్సీ నంబర్ను విడుదల చేసింది. మావోయిస్టు పార్టీ మహారాష్ట్ర,- మధ్యప్రదేశ్, చత్తీస్గఢ్ (ఎంఎంసీ) స్పెషల్ జోనల్ కమిటీ ప్రతినిధి అనంత్ పేరుతో శుక్రవారం రెండో లేఖ రిలీజ్ చేశారు. ఆయుధాలు అప్పగిస్తూ లొంగిపోవడానికి ఫిబ్రవరి 15 వరకు గడువు ఇవ్వాలని మొదటి లేఖలో కోరిన మావోయిస్టు పార్టీ.. ఇప్పుడు మరో 45 రోజుల ముందుగానే ప్రభుత్వానికి లొంగిపోవడానికి సిద్ధమైనట్లు తెలిపింది. మూడు రాష్ట్రాల ముఖ్యమంత్రులు, చత్తీస్ గఢ్ డిప్యూటీ సీఎంను అభ్యర్థిస్తూ ఈ లేఖను మీడియాకు విడుదల చేశారు. జోన్‌‌లో ఎక్కడా మావోయిస్టుల అరెస్టులు, ఎన్కౌంటర్ల వంటి ఘటనలకు పాల్పడకూడదని కోరారు. లొంగిపోవడం అంటే ద్రోహమేమీ కాదని అభిప్రాయపడ్డారు.
ప్రతిపాదనలు, డిమాండ్లను ప్రభుత్వానికి అందిస్తం
‘మావోయిస్ట్ పార్టీ విడుదల చేసిన తొలి లేఖ అనంతరం చత్తీస్ గఢ్ డిప్యూటీ సీఎం, హోం శాఖ మంత్రి విజయ్ శర్మ రేడియోలో చేసిన ప్రసంగం విన్నాం. మావోయిస్టులు లొంగిపోవడానికి 10 నుంచి 15 రోజులు సరిపోతాయని ఆయన అన్నారు. కానీ అంత తక్కువ సమయం మాకు సరిపోదు. ఆయుధాలను వదులుకుని జనజీవన స్రవంతిలోకి రావడానికి మేం నిర్ణయించుకున్న తేదీ జనవరి 1, 2026. దీనిపై ఆయనకు ఎటువంటి అభ్యంతరం ఉండకూడదు’ అని మావోయిస్టు పార్టీ తరఫున అనంత్ లేఖలో పేర్కొన్నారు. ‘మేం కొన్ని నిర్దిష్ట ప్రతిపాదనలు, డిమాండ్లను ప్రభుత్వానికి అందించాలనుకుంటున్నం. లొంగిపోయే ముందు లేదా పునరావాసం తర్వాత మేం వాటిని పత్రికా ప్రకటనలో పేర్కొంటాం’ అని స్పష్టం చేశారు.
మహారాష్ట్ర, మధ్యప్రదేశ్ ప్రభుత్వాలు స్పందించాలి
మావోయిస్టు పార్టీ సభ్యులు ఏకకాలంలో లొంగిపోవడానికి చత్తీస్గఢ్ సర్కారు నుంచి సానుకూల స్పందన వచ్చిందని అనంత్ తెలిపారు. మహారాష్ట్ర, మధ్య ప్రదేశ్ ప్రభుత్వాల నుంచి స్పందనను ఆశిస్తున్నట్టు చెప్పారు. ఈ లోపు భద్రతా దళాల గస్తీని నిలిపివేయాలని కోరారు. లొంగుబాటు ప్రక్రియ పూర్తయ్యే వరకు సహచర మావోయిస్టు సభ్యులు పార్టీ కార్యకలాపాలన్నింటినీ నిలిపివేయాలని అనంత్ పిలుపునిచ్చారు. ఈసారి తమ పార్టీ పీఎల్జీఏ వారోత్సవాలను జరుపుకోబోదని చెప్పారు. మావోయిస్టులెవరైనా ఒంటరిగా వెళ్లి లొంగిపోయేందుకు అవకాశం ఉంటే వెళ్లొచ్చని, పార్టీ నుంచి అభ్యంతరం లేదని పేర్కొన్నారు.
గ్రూప్గా లొంగుబాట్లు
ఎంఎంసీ జోన్ పరిధిలో పనిచేస్తున్న మావోయిస్టులంతా ఒకేసారి గ్రూప్గా తమ ఆయుధాలు అప్పగించి లొంగిపోవడానికి సిద్ధంగా ఉన్నట్లు మావోయిస్టు పార్టీ తాజా లేఖలో స్పష్టం చేసింది. మావోయిస్టులతో సంప్రదింపుల కోసం బావోఫెంగ్ ఓపెన్ ఫ్రీక్వెన్సీ నంబర్ 435.715ను లేఖలో వెల్లడించింది. మావోయిస్టు పార్టీ లొంగుబాట్లకు సంబంధించిన అధికారిక సమాచారాన్ని రేడియోలో ప్రసారం చేయాలని మూడు రాష్ట్రాల ప్రభుత్వాలను కోరింది. లొంగుబాటు ప్రక్రియకు ప్రజాప్రతినిధులు, జర్నలిస్టులు సహకరించాలని విజ్ఞప్తి చేసింది.
దేవ్జీ అరెస్టు చూపాలి
ఏపీ పోలీసుల అదుపులో మావోయిస్టు పార్టీ తాజా చీఫ్ తిప్పరి తిరుపతి అలియాస్ దేవ్జీ సహా 50 మంది మావోయిస్టులు ఉన్నారని చత్తీస్గఢ్ దండకారణ్యం స్పెషల్ జోనల్ కమిటీ కార్యదర్శి వికల్ప్ పేరిట శుక్రవారం ఓ లేఖ విడుదలైంది. వారికి ఎలాంటి ప్రాణ హాని తలపెట్టకుండా తక్షణమే అరెస్టు చూపించాలని వికల్ప్ డిమాండ్ చేశారు. ఈ నెల 18,19 తేదీల్లో హిడ్మా సహా 13 మంది మావోయిస్టుల ఎన్కౌంటర్ బూటకమని ఆ లేఖలో పేర్కొన్నారు.ఈ ఎన్కౌంటర్లకు నిరసనగా 30న భారత్బంద్ నిర్వహించాలని పిలుపునిచ్చారు.
