- ఆయనతో పాటు పోలీసుల అదుపులో మరో దళ సభ్యుడు
- వివరాలు వెల్లడించిన భద్రాద్రి కొత్తగూడెం ఎస్పీ వినీత్
భద్రాద్రికొత్తగూడెం, వెలుగు : మావోయిస్టు పార్టీ రాష్ట్ర కమిటీ మెంబర్ తోట సీతారామయ్యతో పాటు మరో దళ సభ్యుడు పి.రాజ్కుమార్ను అరెస్ట్ చేసినట్టు ఎస్పీ వినీత్ పేర్కొన్నారు. గురువారం ప్రెస్మీట్లో ఆయన మాట్లాడుతూ.. చర్ల బస్టాండ్ ప్రాంతంలో పోలీసులు 141 సీఆర్పీఎఫ్ బెటాలియన్ కలిసి నిర్వహించిన తనిఖీల్లో అనుమానాస్పదంగా కనిపించిన ఇద్దరిని అదుపులోకి తీసుకొని విచారించగా వారు నిషేధిత మావోయిస్టు పార్టీకి చెందిన వారిగా గుర్తించామని తెలిపారు. ఛత్తీస్గఢ్ మావోయిస్ట్ పార్టీ ముఖ్యులను కలిసి తిరిగి హైదరాబాద్కు వెళ్తుండగా చర్ల బస్టాండ్ సెంటర్లో అరెస్టు చేశామన్నారు.
జిల్లాలోని అశ్వాపురం మండలం చింతిర్యాల గ్రామానికి చెందిన తోట సీతారామయ్య అలియాస్ కృష్ణన్న అలియాస్ సంజీవ్ మావోయిస్టు పార్టీ స్టేట్ కమిటీ మెంబర్గా పనిచేస్తున్నారని తెలిపారు. 1982లో పీపుల్స్వార్ లో చేరారు. 2014 నుంచి స్టేట్ కమిటీ మెంబర్గా ఉంటూ సెంట్రల్ కమిటీ స్టాఫ్గా పలువురు ముఖ్య నేతల వద్ద పనిచేశారని చెప్పారు. ఛత్తీస్గఢ్ రాష్ట్రంలోని పలు పోలీస్ స్టేషన్లలో సీతారామయ్యపై విధ్వంస ఘటనలు, హత్యలు, పోలీసులపై దాడులకు సంబంధించి పలు కేసులున్నాయన్నారు. సీతారామయ్యపై తెలంగాణ గవర్నమెంట్ రూ. 20లక్షల రివార్డు ప్రకటించిందన్నారు.
మరో దళ సభ్యుడైన పాదం రాజ్ కుమార్ 2019 నుంచి మావోయిస్ట్ పార్టీలో దళ సభ్యుడిగా పనిచేస్తున్నారన్నారు. పలు హత్యకేసులు, పోలీసులపై దాడులు, ప్రెషర్ బాంబులు అమర్చడంతో పాటు 2021లో ఛత్తీస్గఢ్ సీఆర్పీఎఫ్ పోలీసులపై కాల్పులు జరిపి 24 మంది సీఆర్పీఎఫ్ పోలీసులను చంపి, ఆయుధాలు లూటీ చేసిన ఘటనలో రాజ్కుమార్ ఉన్నారని తెలిపారు. వీరి వద్ద నుంచి మావోయిస్టు సాహిత్యం, రివాల్వర్, బుల్లెట్స్, రూ. 3.40 లక్షలు నగదు, సెల్ ఫోన్లు, పెన్ డ్రైవ్ స్వాధీనం చేసుకున్నామని వివరించారు.
