హైదరాబాద్, వెలుగు: గ్రేటర్ సిటీలో గ్రీనరీకి ఇంపార్టెన్స్ ఇస్తున్నామని.. అందులో భాగంగా మొక్కలను పెంచుతున్నామని మేయర్ గద్వాల్ విజయలక్ష్మి తెలిపారు. రాష్ట్ర వ్యాప్తంగా శనివారం చేపట్టిన కోటి మొక్కలు నాటే ప్రోగ్రామ్లో భాగంగా బంజారాహిల్స్లోని గఫార్ ఖాన్ పార్కులో ఆమె మొక్కలు నాటారు. ఈ సందర్భంగా మేయర్ మాట్లాడుతూ.. గ్రేటర్ పరిధిలో ఒక్కరోజే లక్షా 50 వేల మొక్కలు నాటామని తెలిపారు. హరితహారంలో భాగంగా జీహెచ్ఎంసీ పరిధిలో 2014 నుంచి 2022–-23 వరకు 741 లక్షల మొక్కలు నాటాలని లక్ష్యం పెట్టుకోగా.. 698.78 లక్షల మొక్కలు నాటినట్లు వివరించారు.
అవెన్యూ ప్లాంటేషన్, కాలనీ ఇనిస్టిట్యూషన్, ఓపెన్ స్పేస్, శ్మశాన వాటికల్లో పచ్చదనం పెంచేందుకు జీహెచ్ఎంసీ ఆధ్వర్యంలో కృషి చేస్తున్నట్లు తెలిపారు. ఈ ఆర్థిక సంవత్సరంలో గ్రేటర్ పరిధిలో జీహెచ్ఎంసీ ఆధ్వర్యంలో 50 లక్షలు మొక్కలు నాటాలని లక్ష్యం పెట్టుకుని.. ఇప్పటివరకు సుమారు 42 లక్షల మొక్కలను నాటామని ఆమె వివరించారు. వీఎస్టీ వద్ద బల్దియా కమిషనర్ రోనాల్డ్ రోస్ ఎమ్మెల్యే ముఠా గోపాల్తో కలిసి మొక్కలు నాటారు. హిమాయత్సాగర్లోని వాటర్ బోర్డు గార్డెన్లో ఎండీ దానకిశోర్ మొక్కలు నాటారు.
