1990ల్లో బాలీవుడ్లో హీరోయిన్గా పేరుతెచ్చుకున్న ‘మయూరీ కాంగో’ గుర్తుందా? ‘పాపా కెహతే హై’ లో ‘ఘర్ సే నికల్తే...’ పాట ఆమెను ఎంతో పాపులర్ చేసింది. అయితే అప్పట్లో వరుస సినిమాలతో జాతీయ స్థాయిలో అవార్డులు అందుకున్న ఆమె మధ్యలో సినిమాలకు గుడ్బై చెప్పింది. సినిమా ఇండస్ట్రీ నుంచి బిజినెస్ వైపు వెళ్లింది. తరువాత గూగుల్ ఇండియా ఏజెన్సీ హెడ్ బాధ్యతలు చేపట్టి అక్కడ కూడా సూపర్ హిట్గా నిలిచిన మయూరి గురించి...
మయూరీ కాంగో కార్పొరేట్ ఫీల్డ్లో తనదైన ముద్ర వేస్తోంది. గ్లోబల్ మార్కెటింగ్ ఏజెన్సీ కంపెనీల్లో మయూరీ కీలకంగా పని చేసింది. అదే అనుభవంతో ఇప్పుడు గూగుల్ ఇండియా ఏజెన్సీ హెడ్గా పని చేస్తోంది.2009 తర్వాత ఆమె సినిమాలు చేయడం ఆపేసింది. పెద్ద చదువులు చదివి బిజినెస్ మేనేజ్మెంట్ వైపు అడుగేసింది.
యాక్టింగ్ నుంచి కార్పొరేట్ వైపు..
సుమారు పదేళ్ల పాటు సినీ ఫీల్డ్లో ఉన్న ఆమె.. ఒకవైపు నటిస్తూనే మరోవైపు చదువు పూర్తి చేసింది. యాక్టింగ్తో ఎంతోమంది ఫ్యాన్స్ను సంపాదించిన ఆమె చివరిసారిగా సైఫ్ అలీఖాన్ సినిమా ‘కుర్బాన్’లో గెస్ట్ అప్పియరెన్స్ ఇచ్చింది. 2009లో సినీ కెరీర్కు గుడ్బై చెప్పింది. 2011లో కుటుంబంతో కలిసి న్యూయార్క్‌‌కు షిఫ్ట్ అయ్యింది. అక్కడ ‘సిటీ యూనివర్సిటీ ఆఫ్ న్యూయార్క్లో’లో మార్కెటింగ్ అండ్ ఫైనాన్స్‌‌లో ఎంబీఏ చేసింది. ఆ తర్వాత కొంత కాలం ‘ప‌‌ర్ఫార్మిక్స్ ల్యాబ్’ అనే కంపెనీకి మేనేజింగ్ డైరెక్టర్గా పని చేసింది. ఆ తర్వాత 2019 నుంచి గూగుల్ ఇండియాకు ఇండస్ట్రీ హెడ్గా బాధ్యతలు చేపట్టింది ‘గూగుల్ ఇండియా కార్పొరేట్ విభాగం ప్రస్తుతం చాలా మారుతోంది. గూగుల్ లో భాగం కావడానికి నేను చాలా సంతోషిస్తున్నాను, ఏజెన్సీ రంగంలో ఉన్న నా పదేళ్ల అనుభవం గూగుల్ కంపెనీలో పని చేసేందుకు పనికొస్తుంది. ఇంతటి పెద్ద కంపెనీలలో పని చేయడం అద్భుతమైన అవకాశం అనుకుంటున్నా’ అన్నదామె.
‘నేను ఒక ప్యాషనేట్ మార్కెటర్ను. ప్రపంచవ్యాప్తంగా ఒక బ్రాండ్ను మార్కెట్ చేయడానికి వీలుండే అవకాశాలను స్టడీ చేయడం నాకు ఇష్టం. ముఖ్యంగా డిజిటల్ మీడియా ద్వారా ఇది సాధ్యం అవుతుంది. కొత్త విషయాలను నేర్చుకోవడానికి, సవాళ్లను స్వీకరించడానికి ఎప్పుడూ ముందుంటాను. నా క్లయింట్స్కు, కంపెనీలకు ఉత్తమ మార్కెటింగ్ సొల్యూషన్స్ ఇవ్వడమే నా లక్ష్యం.’ - మయూరి కాంగో
