9 ఏళ్ల కిందనే ఆర్టీసీలో మేఘా ఎంట్రీ
₹10.8 కోట్లు ఎగ్గొట్టింది
బస్సుల్లో ఎల్సీడీల ఏర్పాటుకు ఒప్పందం
డేట్ ప్రకారం ముందుకు కదలని అగ్రిమెంట్
నోటీస్ ఇవ్వకుండానే మధ్యలో డ్రాప్
బకాయిలు చెల్లించకుండానే ₹2.85 కోట్ల డిపాజిట్లు వెనక్కి
ఎల్సీడీలూ తీసుకెళ్లిన వైనం చక్రం తిప్పిన నాటి ఎంపీ
బకాయిలు చెల్లించకుండానే ₹2.85 కోట్ల డిపాజిట్లు వెనక్కి
హైదరాబాద్, వెలుగు:ఆర్టీసీకి మేఘా కృష్ణారెడ్డి మెయిల్ కంపెనీ ₹10.8 కోట్ల బాకీలు ఎగ్గొట్టింది.సంస్థతో చేసుకున్న ఒప్పందాన్ని ఉల్లంఘించింది. అయితే, ఈ కేసు ఇప్పటిది కాదు. ప్రస్తుతం ఆర్టీసీలో మేఘాకు చెందిన 40 ఎలక్ట్రిక్ బస్సులు నడుస్తున్న సంగతి తెలిసిందే. కానీ, ఆ కంపెనీ 2010లోనే ఆర్టీసీలోకి ఎంట్రీ ఇచ్చింది. బస్సుల్లో ఎల్సీడీలు పెట్టి, ప్రకటనల ద్వారా ఆదాయం పొందేలా యాజమాన్యంతో మేఘా కంపెనీ ఒప్పందం చేసుకుంది. ఆ ప్రాజెక్టును మధ్యలోనే వదిలేసిన సంస్థ, రాజకీయ పైరవీలు చేసి ఆర్టీసీకి చెల్లించాల్సిన బకాయిలను ఎగ్గొట్టింది. బస్సుల్లో పెట్టిన ఎల్సీడీలనూ తీసుకెళ్లింది.
ఒప్పందం ఇదీ..
ఉమ్మడి ఏపీలో 21,165 బస్సుల్లో ఎల్సీడీలు ఏర్పాటు చేసి, వినోద కార్యక్రమాలను ప్రసారం చేయాలి. అందుకు తగ్గట్టు 2010 జనవరి 1 నుంచి 2024 డిసెంబర్ 31 వరకు 15 ఏళ్ల పాటు కంపెనీ ఒప్పందం చేసుకుంది. ప్రకటనల ద్వారా మేఘా కంపెనీ ఆదాయాన్ని పొందొచ్చు. అందుకుగానూ ఒక్కో బస్సుకు కంపెనీ నెలకు రూ.225 చెల్లించాల్సి ఉంటుంది. 2010 ఆగస్టు 31 వరకు మేఘదూత్, సూపర్ లగ్జరీ, డీలక్స్ బస్సులు, 2011 జూన్ 30 వరకు ఇతర బస్సుల్లో టీవీలు ఏర్పాటు చేయాలి. ఆ గడువులోగా పెట్టకపోతే బస్సుకు ₹100 చొప్పున ఫైన్ వేస్తారు. ఆ షరతులన్నింటికీ ఒప్పుకుని ఆర్టీసీతో కంపెనీ ఒప్పందం చేసుకుంది. ₹2.85 కోట్ల డిపాజిట్ కూడా కట్టింది. కానీ, కంపెనీ టీవీలు పెట్టడంలో ఎప్పుడూ ఆలస్యమే చేసింది. అనుకున్న డేట్ కాకుండా ఏడాది పాటు లేట్ చేసింది.
దీనిపై ఆర్టీసీ అధికారులు సమావేశమై చర్చించారు. 2011 జులై 6న కంపెనీకి షోకాజ్ నోటీసులిచ్చారు. కంపెనీ ఆలస్యం చేయడం వల్ల పీక్ సీజన్లో ప్రభావం చూపుతుందని అసంతృప్తి వ్యక్తం చేశారు. లైసెన్స్ ఫీజు కూడా చెల్లించలేదని నోటీసుల్లో పేర్కొన్నారు. 2011 జూన్ 30 నాటికి బకాయిలు ₹7.08 కోట్లకు చేరుకున్నాయని కంపెనీ దృష్టికి తీసుకెళ్లారు. 1,789 సూపర్ లగ్జరీ బస్సులకు గానూ 1,274 బస్సుల్లో మాత్రమే ఎల్సీడీలు ఏర్పాటు చేశారని గుర్తు చేసింది. అయినా కూడా కంపెనీ నుంచి ఎలాంటి స్పందనా రాలేదు. చెప్పాపెట్టకుండానే ఒప్పందం నుంచి తప్పుకుంది.
రాజ్యసభ సభ్యుడి పైరవీ
ఒప్పందం ప్రకారం మెయిల్ కంపెనీ ఎల్సీడీలు పెట్టకపోవడంతో ఆర్టీసీకి కంపెనీ ₹16 కోట్ల దాకా బకాయి పడింది. అందులో లైసెన్స్ ఫీజు ₹14.5 కోట్లు కాగా, మిగతా ₹1.5 కోట్లు సర్వీస్ ట్యాక్స్. కానీ, ఒప్పందం నుంచి కంపెనీ తప్పుకున్నాక, అప్పట్లో వేసిన ఓ కమిటీ బకాయిల్లో ₹6 కోట్ల వరకు మాఫీ చేసినట్టు తెలుస్తోంది. ఒప్పందం నుంచి తప్పుకునే ముందు నోటీసు ఇవ్వకపోతే, సెక్యూరిటీ డిపాజిట్ను తిరిగివ్వరు. అయితే, రాష్ట్రంలో చక్రం తిప్పిన నాటి రాజ్యసభ సభ్యుడు ₹10. 8 కోట్ల బకాయిలు చెల్లించకుండా పైరవీ చేయించారన్న ఆరోపణలున్నాయి. దాంతో పాటే కట్టిన సెక్యూరిటీ డిపాజిట్నూ తిరిగివ్వడంలో ఎండీ స్థాయిలో పైరవీలు చేయించారని అంటున్నారు. అది కాకుండా బస్సుల్లో అప్పటికే పెట్టిన ఎల్సీడీలనూ తిరిగి తీసుకెళ్లారని చెబుతున్నారు.
