నారాయణపేట, వెలుగు : కేంద్రం తెలంగాణకు బకాయి పడ్డ రూ.1100 కోట్లు, జీఎస్టీ కింద రూ.11వేల కోట్లు వెంటనే ఇవ్వాలని రాష్ట్ర వైద్య, ఆరోగ్య, ఆర్థిక శాఖ మంత్రి తన్నీరు హరీశ్‌రావు కేంద్రాన్ని డిమాండ్ చేశారు. నారాయణపేట జిల్లాలో పలు అభివృద్ధి పనులను ప్రారంభించిన ఆయన తర్వాత ఏర్పాటు చేసిన బహిరంగసభలో మాట్లాడారు. గత 2 నెలల్లో రాష్ట్రంలోని అన్ని గ్రామపంచాయతీలకు రూ.1144 కోట్ల పెండింగ్ బిల్లులను చెల్లించామని, మిగితావి రావాల్సి ఉంటే అవి కేంద్ర నిధులేనని, చేతనైతే ఇక్కడి బీజేపీ నేతలు కేంద్రానితో చెప్పి ఇప్పించాలన్నారు. గ్రామపంచాయతీలకు రాష్ట్రం నిధులు ఇవ్వదని చెప్పడం కరెక్ట్ కాదన్నారు. కర్నాటకలో అప్పర్భద్ర, ఏపీలో పోలవరం, ఎంపీలో కెన్ బెత్మా ప్రాజెక్టులకు జాతీయ హోదా ఇచ్చిన కేంద్రం పాలమూరు –రంగారెడ్డికి ఎందుకు జాతీయ హోదా ఇవ్వడం లేదని ప్రశ్నించారు. వరంగల్కు కోచ్ ఫ్యాక్టరీ ఇవ్వాలని పదేపదే కోరుతున్నా ఇవ్వకుండా గుజరాత్కు కోచ్ ఫ్యాక్టరీ కేటాయించారన్నారు. రాష్ట్ర విభజన చట్టంలో ఉన్నవి ఒక్కటి కూడా అమలు చేయలేదని, ఏ ముఖం పెట్టుకుని ప్రధాని మోడీ, అమిత్షాలు తెలంగాణకు వస్తున్నారో చెప్పాలన్నారు. మంత్రి శ్రీనివాస్ గౌడ్, ఎంపీ మన్నె శ్రీనివాస్రెడ్డి, ఎమ్మెల్యేలు పాల్గొన్నారు.
