- ఉత్తర్వులు జారీ చేసిన మహిళా స్త్రీ శిశు సంక్షేమ శాఖ
హైదరాబాద్, వెలుగు: ఆదివాసి గిరిజన ప్రాంతాల్లో అంగన్వాడీ సిబ్బంది నియామకాలకు సంబంధించిన రోస్టర్ పాయింట్ల ఖరారు కోసం మహిళా శిశు సంక్షేమ శాఖ ఓ కమిటీ ఏర్పాటు చేసింది. మంత్రి సీతక్క ఆదేశాల మేరకు జాయింట్ డైరెక్టర్ జీకే సునందతో పాటు మరో ముగ్గురు అధికారులు కమిటీలో ఉంటారు. ఈ మేరకు స్ర్తీ శిశు సంక్షేమ శాఖ డైరెక్టర్ శ్రీజన ఆదేశాలు జారీ చేశారు. ఏపీ, కర్నాటక, చత్తీస్గఢ్ రాష్ట్రాల్లో అవలంబిస్తున్న విధానాలపై ఈ కమిటీ అధ్యయనం చేసి మంత్రి సీతక్కకు రిపోర్ట్ ఇస్తుంది.
నివేదిక ఆధారంగా రోస్టర్ పాయింట్లను ప్రభుత్వం ఖరారు చేయనున్నది. రాష్ట్రంలో 14 వేలకు పైగా అంగన్వాడీ టీచర్లు, హెల్పర్ల పోస్టులు ఖాళీ ఉన్నాయి. త్వరలో వీటిని భర్తీ చేసేందుకు ప్రభుత్వం కసరత్తు చేస్తున్నది. ఏజెన్సీ ఏరియాలో ఆదివాసీలకే ఉద్యోగాలు కల్పించే జీవో నంబర్ 3ను సుప్రీం కోర్టు రద్దు చేసింది. అయితే, అంగన్వాడీ చిన్నారులకు అలనా.. పాలనా.. పూర్వ ప్రాథమిక విద్యా బోధన మాతృభాషలోనే (ట్రైబల్ ఏరియాల్లో వారి భాష) ఉండాలని ప్రభుత్వం భావిస్తున్నది.
