హైదరాబాద్: జూబ్లీహిల్స్ ఉప ఎన్నికలో కాంగ్రెస్కు మంచి మెజారిటీ ఇస్తే మరింత స్ట్రాంగ్గా పని చేస్తామని మంత్రి వివేక్ వెంకటస్వామి అన్నారు. జూబ్లీహిల్స్ ఉప ఎన్నిక ప్రచారంలో భాగంగా శుక్రవారం (అక్టోబర్ 31) షేక్ పేట్ డివిజన్లోని పరమాంట్ కాలనీలో మైనార్టీ నేతల సమావేశం నిర్వహించారు. మంత్రి వివేక్ ఈ సమావేశానికి ముఖ్య అతిథిగా హాజరై ప్రసంగించారు.
నాయకుడు అంటే నిత్యం ప్రజల్లో ఉండి వాళ్ల సమస్యలు తెలసుకోవాలని.. కాంగ్రెస్ అభ్యర్థి నవీన్ యాదవ్లో ఆ లక్షణాలు ఉన్నాయని అన్నారు. గత 10 ఏళ్లలో బీఆర్ఎస్ రాష్ట్రాన్ని నిర్లక్ష్యం చేసిందని విమర్శించారు. ముస్లింలకు సీఎం రేవంత్ రెడ్డి అధిక ప్రాధాన్యం ఇస్తున్నారని.. ఇందులో భాగంగానే ముస్లిం వ్యక్తిని అడిషనల్ అడ్వకేట్ జనరల్గా నియమించారని తెలిపారు.
ముస్లిం వ్యక్తికి మంత్రి పదవి ఇవ్వాలని రేవంత్ రెడ్డి ముందే నిర్ణయించారని.. కానీ ఎమ్మెల్యే లేకపోవడంతో ఇవ్వలేదన్నారు. ఈ నేపథ్యంలోనే అజారుద్దీన్కు ఎమ్మెల్సీ పదవి ఇచ్చి మంత్రిని చేశారన్నారు. అజారుద్దీన్కు మంత్రి పదవి దక్కకుండా బీజేపీ ప్రయ్నతం చేసిందని అన్నారు.
బీజేపీ, బీఆర్ఎస్ రెండు పార్టీలు ఒక్కటేనని.. బీఆర్ఎస్కు ఓటేస్తే బీజేపీకి వేసినట్లేనన్నారు. గత పార్లమెంట్ ఎన్నికల్లో బీఆర్ఎస్ ఓట్లు అన్ని బీజేపీకె పడ్డాయని ఆరోపించారు. కాంగ్రెస్ అభ్యర్థి నవీన్ యాదవ్ను భారీ మెజార్టీతో గెలిపించాలని.. ఎన్నిక తర్వాత ముస్లింలకు స్మశాన వాటిక స్థలం కేటాయిస్తామని హామీ ఇచ్చారు.
