న్యూఢిల్లీ: ఇండియా భూభాగంలోకి ఏ విదేశీయులూ (చైనీయులు) రాలేదని, ప్రస్తుతం ఆ టెర్రిటరీలో ఎవరూ లేరని అఖిలపక్ష సమావేశంలో ప్రధాని మోడీ చెప్పిన సంగతి తెలిసిందే. దీనిపై మోడీని విమర్శిస్తూ ప్రతిపక్ష కాంగ్రెస్ నేతలు పలు వ్యాఖ్యలు చేశారు. చైనా దూకుడుకు మోడీ లొంగిపోయారని, ఆ భూభాగం చైనాదే అయితే.. మన సైనికులు ఎందుకు చనిపోయారు? వాళ్లు ఎందుకు చనిపోయారు అంటూ కాంగ్రెస్ నేత రాహుల్ గాంధీ ట్వీట్ చేశారు. చైనాకు మోడీ క్లీన్ చిట్ ఇస్తున్నారా.. అంటూ కాంగ్రెస్ సీనియర్ లీడర్ పి.చిదంబరం మండిపడ్డారు. దీంతో ఈ విషయంపై శనివారం ప్రధాన మంత్రి కార్యాలయం (పీఎంవో) స్పందించింది. ఈ విమర్శలను ప్రధాని మోడీకి ‘కొంటె వివరణ’ ఇచ్చే యత్నంగా పీఎంవో కొట్టి పారేసింది. ‘దేశ సైనికుల ధైర్య సాహసాల వల్ల మన వైపు ఉన్న లైన్ ఆఫ్ యాక్చువల్ కంట్రోల్‌ (ఎల్‌ఏసీ) వద్ద చైనీయులు ఎవ్వరూ లేరని ప్రధాన మంత్రి పరిశీలనల ప్రకారం తెలిసింది. 16వ బిహార్ రెజిమెంట్ సైనికుల త్యాగాల వల్ల చైనా తలపెట్టిన నిర్మాణాలకు అడ్డుకట్ట పడటంతోపాటు.. ఆ రోజు ఎల్‌ఏసీ దగ్గర అతిక్రమణ యత్నాన్ని సక్సెస్‌ఫుల్‌గా అడ్డుకున్నాం’ అని పీఎంవో పేర్కొంది.
