హైదరాబాద్: గోదావరి జిల్లాల పచ్చదనం వల్లే ఉమ్మడి ఆంధ్రప్రదేశ్ విడిపోయిందని, కోనసీమకు తెలంగాణ నాయకుల దిష్టి తగిలిందని ఆంధ్రప్రదేశ్ డిప్యూటీ సీఎం, జనసేన అధినేత పవన్ కల్యాణ్ చేసిన వ్యాఖ్యలు వివాదస్పదంగా మారాయి. ఈ క్రమంలో పవన్ కల్యాణ్ వ్యాఖ్యలపై తెలంగాణ కాంగ్రెస్ నేత, జడ్చర్ల ఎమ్మెల్యే అనిరుధ్ రెడ్డి ఘాటుగా రియాక్ట్ అయ్యారు.
తెలంగాణ వాళ్ళ నర దిష్టి తగిలినందుకే కోనసీమ జిల్లాలోని కొబ్బరి చెట్లు ఎండిపోయాయని పవన్ కల్యాణ్ అంటున్నాడు.. తెలంగాణ వాళ్లది నరదిష్టి అయితే హైదరాబాద్‌లో ఎందుకు ఆస్తులు కొంటున్నావు.. ఇక్కడ ఉన్న ఆస్తులు అమ్ముకొని విజయవాడ వెళ్లిపో అని అన్నారు. పవన్ కళ్యాణ్ ఆంధ్రాకి డిప్యూటీ సీఎం.. ఉండేది, బిజినెస్ చేసుకునేది మాత్రం తెలంగాణలో.. మరీ నిజంగా తెలంగాణ వాళ్ళకి నర దిష్టి, ఒకరు బాగు పడొద్దు అనేది ఉంటే ఆంధ్రా వాళ్ళు ఇక్కడ బిజినెస్ చేసుకుంటారా అని ప్రశ్నించారు.
తెలంగాణలో ఇరిగేషన్, కన్‌స్ట్రక్షన్‌ అన్నింట్లో ఆంధ్రా వాళ్ళు ఉన్నారు.. అయినా మేము ఒక్క మాటైనా అంటున్నామా అని నిలదీశారు. నేను కూడా పవన్ కళ్యాణ్ అభిమానినే.. కానీ ఆయన తప్పు మాట్లాడాడు. కాబట్టి పవన్ కల్యాణ్ తెలంగాణ ప్రజలకు క్షమాపణలు చెప్పాలని ఎమ్మెల్యే అనిరుధ్ రెడ్డి డిమాండ్ చేశారు. పవన్ కళ్యాణ్ సినిమా ఓజీ సినిమా ఫ్లాప్ అయినా కూడా ప్రొడ్యూసర్ బతకాలని రూ.800 టికెట్ కొని సినిమా చూశానని చెప్పారు.
పవన్ కల్యాణ్ను ప్యాకేజ్ స్టార్ అంటారని.. దమ్ముంటే ఆయన టీడీపీని వదిలి ఒంటరిగా పోటీ చెయ్యాలని సవాల్ విసిరారు. పవన్ కల్యాణ్ 70 ఏళ్లు అయినా సీఎం కాలేడని అన్నారు. ఇదిలా ఉంటే.. పవన్ కల్యాణ్ వ్యాఖ్యలపై మాజీ మంత్రి, బీఆర్ఎస్ ఎమ్మెల్యే జగదీష్ రెడ్డి కూడా స్పందించారు. కోనసీమకు తెలంగాణ నాయకుల దిష్టి తగిలిందన్న పవన్ వ్యాఖ్యలను తీవ్రంగా ఖండించారు.
