స్టేషన్ ఘన్పూర్ ఎమ్మెల్యే రాజయ్య వ్యాఖ్యలు
జనగామ, వెలుగు: టీఆర్ఎస్ సభ్యత్వం ఉన్నోళ్లకే సంక్షేమ పథకాలు అమలు చేస్తామని, విధిగా పార్టీ సభ్యత్వం ఉండాల్సిందేనని స్టేషన్ ఘన్పూర్ ఎమ్మెల్యే తాటికొండ రాజయ్య వివాదాస్పద వ్యాఖ్యలు చేశారు. ‘‘గతంలో ఎలక్షన్ల వరకే రాజకీయాలు.. తర్వాత అందరికీ సంక్షేమ పథకాలు అన్నట్టు ఉండేది. ఇప్పుడు అలా కాదు.. తనకు లేని ధర్మం లేదు.. ఇప్పటినుంచి రాబోయే మూడేండ్లలో టీఆర్ఎస్ సభ్యత్వం ఉంటేనే ప్రభుత్వ సంక్షేమ పథకాలు” అని చెప్పారు. టీఆర్ఎస్ సభ్యత్వ నమోదులో భాగంగా ఆయన శనివారం తన నియోజకవర్గంలోని చిల్పూరు మండలం రాజవరం, నునావత్ తండాలో మాట్లాడారు. పార్టీ శ్రేణులను కాపాడుకోవాలన్న ఉద్దేశంతో టీఆర్ఎస్ సభ్యత్వం ఉన్న కుటుంబ సభ్యుల్లో అర్హులకు మాత్రమే పెన్షన్లు, రేషన్కార్డులు, డబుల్ బెడ్ రూం ఇండ్లు తదితర పథకాలను అమలు చేస్తామన్నారు. పార్టీ కార్యకర్తలకే ప్రాధాన్యం ఇస్తామని తేల్చిచెప్పారు. సభ్యత్వాల పెంపు కోసం తన సొంత హాస్పిటల్లో మెడికల్ రాయితీలు ఇస్తామని, హెల్త్ కార్డులు జారీ చేస్తామని, దీనికి సంబంధించి తన పుట్టిన రోజైన మార్చి 2న ప్రకటన చేస్తానని పేర్కొన్నారు. నునావత్ తండాలో ఇండ్ల స్థలాలు ఉన్న అర్హులందరికీ వారి స్థలాల్లోనే డబుల్ బెడ్రూం ఇండ్ల నిర్మాణానికి రూ. 6 లక్షల చొప్పున అందిస్తామన్నారు. ఇటీవల జనగామలో జరిగిన టీఆర్ఎస్ సభ్యత్వ నమోదు కార్యక్రమంలో జనగామ ఎమ్మెల్యే ముత్తిరెడ్డి యాదగిరి రెడ్డి కూడా పార్టీ కార్యకర్తలు చెప్పినోళ్లకే పథకాలని, కండువా కప్పుకున్నోళ్లకే డబుల్ బెడ్రూం ఇండ్లని అన్నారు.