ప్రశాంతంగా ఎమ్మెల్సీ బై పోల్

ఉమ్మడి పాలమూరులోని పది సెంటర్లలో 99.86 శాతం పోలింగ్ నమోదు
ఎక్స్ అఫీషియో హోదాలో కొడంగల్లో ఓటేసిన సీఎం రేవంత్రెడ్డి
క్యాంపుల నుంచి డైరెక్ట్గా బస్సుల్లో పోలింగ్ బూత్లకు వచ్చిన లోకల్ బాడీస్ ప్రజాప్రతినిధులు

మహబూబ్నగర్/గద్వాల/నాగర్కర్నూల్/వనపర్తి, వెలుగు: మహబూబ్నగర్లోకల్ బాడీస్ ఎమ్మెల్సీ స్థానానికి గురువారం నిర్వహించిన ఎన్నికలు ప్రశాంతంగా ముగిశాయి. ముందు నుంచీ అనుకున్నట్లే ఓటర్లంతా క్యాంపుల నుంచి నేరుగా పోలింగ్ సెంటర్లకు ప్రత్యేక బస్సులు, స్పెషల్ వెహికల్స్లో వచ్చి ఓటు హక్కు వినియోగించుకున్నారు. మొత్తం 1,439 ఓట్లకు 1,437 ఓట్లు పోల్ అవగా, 99.86 శాతం ఓటింగ్ నమోదైంది. సీఎం రేవంత్రెడ్డి ఎక్స్ అఫీషియో హోదాలో కొడంగల్లో ఓటు వేశారు. పోలింగ్కు కొద్ది నిమిషాల ముందు ఓటర్లకు బీఆర్ఎస్ అభ్యర్థి పంచినట్లుగా చెప్తున్న గోల్డ్ కాయిన్స్ సోషల్ మీడియాలో వైరల్గా మారాయి.

ఎనిమిది సెంటర్లలో వంద శాతం పోలింగ్

ఎమ్మెల్సీ ఎన్నికల్లో కాంగ్రెస్ నుంచి మన్నే జీవన్ రెడ్డి, బీఆర్ఎస్ నుంచి నవీన్ రెడ్డి, సుదర్శన్ గౌడ్ బరిలో నిలిచారు. క్యాంపెయినింగ్కు సుదర్శన్ గౌడ్ దూరంగా ఉండడంతో జీవన్, నవీన్ మధ్యే ప్రధాన పోటీ నడిచింది. బై పోల్ సందర్భంగా ఉమ్మడి జిల్లాలోని మహబూబ్నగర్, కొడంగల్, నారాయణపేట, షాద్నగర్, నాగర్కర్నూల్, అచ్చంపేట, వనపర్తి, కల్వకుర్తి, గద్వాల, కొల్లాపూర్లలో పోలింగ్ సెంటర్లు ఏర్పాటు చేశారు. ఇందులో నాగర్కర్నూల్, నారాయణపేట సెంటర్లు మినహా అన్ని చోట్లా వంద శాతం పోలింగ్ రికార్డయ్యింది. నాగర్కర్నూల్ సెం టర్లో 101 మంది ఓటర్లకు వంద ఓట్లు పోలయ్యాయి. నారాయణపేటలో 205 ఓటర్లకు 204 మంది ఓట్లు వేశారు. కొల్లాపూర్ పోలింగ్ కేంద్రంలో 67 మందికి 67 మంది, అచ్చంపేటలో 79 మందికి 79, కల్వకుర్తిలో 72 మందికి 72, షాద్నగర్171 మందికి 171, వనపర్తిలో 218 మందికి 218, గద్వాలలో 225 మందికి 225, పాలమూరులో 245 ఓటర్లకు గాను 254 మంది ఓటు హక్కు వినియోగించుకున్నారు. ఉదయం ఎనిమిది గంటల నుంచి సాయంత్రం నాలుగు గంటల వరకు పోలింగ్ ప్రక్రియ కొనసాగగా, షాద్నగర్, కొడంగల్ పోలింగ్ స్టేషన్లలో మధ్యాహ్నం రెండు గంటలకే వంద శాతం పోలింగ్ నమోదైంది. మిగిలిన సెంటర్లలో నాలుగు గంటల వరకు కొనసాగింది.

క్యాంపుల నుంచి డైరెక్ట్గా బస్సుల్లో సెంటర్లకు..

ఎనిమిది రోజులుగా లోకల్ బాడీస్ ప్రజాప్రతినిధులు క్యాంపుల్లో ఉన్నారు. క్రాస్ ఓటింగ్ జరుగుతుందనే ఉద్దేశంతో బీఆర్ఎస్, కాంగ్రెస్, బీజేపీ లీడర్లు ఆయా పార్టీల ఎంపీటీసీలు, జడ్పీటీసీలు, మున్సిపల్ కౌన్సిలర్లను గోవా, ఊటీ, కొడైకెనాల్, నెల్లూరు తదితర ప్రాంతాలకు తరలించారు. బుధవారం వీరు ఆ ప్రాంతాల నుంచి ప్రత్యేక బస్సుల్లో బయల్దేరినా.. క్రాస్ ఓటింగ్ జరుగుందనే భయంతో క్యాండిడేట్లు వీరిని ఉదయం పోలింగ్ జరిగే సమయం వరకు రిసార్ట్స్లో ఉంచారు. ప్రధానంగా మహబూబ్నగర్, నారాయణపేట, కొడంగల్, గద్వాల ప్రాంతాలకు చెందిన ఓటర్లను రాయచూర్ ప్రాంతంలోని కొన్ని రిసార్టుల్లో ఉంచగా.. అచ్చంపేట, కొల్లాపూర్, వనపర్తి, షాద్నగర్, కల్వకుర్తి, నాగర్కర్నూల్ ప్రాంతాలకు చెందిన వారిని హైదరాబాద్లోని రిసార్ట్స్లో ఉంచినట్లు తెలిసింది. వీరిని ఉదయం ఎనిమిది గంటల తర్వాత ఆయా ప్రాంతాల్లోని రిసార్ట్స్ నుంచి పోలింగ్ సెంటర్లకు తరలించారు. అన్ని సెంటర్లలో ఉదయం ఎనిమిది గంటల నుంచి పది గంటల వరకు కేవలం 15 శాతం నుంచి 25 శాతంలోపే పోలింగ్ పర్సంటేజ్ నమోదైంది. పది గంటల తర్వాత ఒక్కొక్క బ్యాచ్గా ఓటర్లు బస్సులు దిగుతూ పోలింగ్ సెంటర్లోకి వచ్చి ఓటు హక్కు వినియోగించుకున్నారు. దీంతో మధ్యాహ్నం 12 గంటల వరకు అన్ని సెంటర్లలో దాదాపు 70 శాతానికి పైగా పోలింగ్ నమోదైంది. ఆ తర్వాత రెండు గంటల వరకు కొన్ని సెంటర్లలో వంద శాతం పూర్తి కాగా, మిగిలిన సెంటర్లలో నాలుగు గంటల వరకు వంద శాతం పోలింగ్ నమోదైంది.

ఓటు హక్కును వినియోగించుకున్న ప్రముఖులు

ఎమ్మెల్సీ బై పోల్ సందర్భంగా ఎక్స్ ఆఫీషియో సభ్యులు తమ ఓటు హక్కును వినియోగించుకున్నారు. సీఎం ఎనుముల రేవంత్ రెడ్డి తన సొంత నియోజకవర్గమైన కొడంగల్లో మధ్యాహ్నం రెండు గంటలకు ఓటు హక్కును వినిగించుకున్నారు. ఓటు వేసేందుకు ఆయన హైదరాబాద్ నుంచి రోడ్డు మార్గాన కొడంగల్ చేరుకొని ఓటు వేశారు. అనంతరం ఆయన నివాసంలో కాంగ్రెస్ పార్టీ ముఖ్య కార్యకర్తలు, లీడర్లతో పార్లమెంట్ ఎన్నికలపై ఆ పార్టీ మహబూబ్నగర్ పార్లమెంట్ క్యాండిడేట్ చల్లా వంశీచంద్ రెడ్డితో కలిసి సమావేశం నిర్వహించారు. ఎక్సైజ్ శాఖ మంత్రి జూపల్లి కృష్ణారావు కొల్లాపూర్లో తన ఓటు హక్కు వినియోగించుకున్నారు. మహబూబ్నగర్లో ఎంపీ మన్నే శ్రీనివాస్ రెడ్డి, మహబూబ్నగర్, జడ్చర్ల, దేవరకద్ర ఎమ్మెల్యేలు యెన్నం శ్రీనివాస్ రెడ్డి, జనంపల్లి అనిరుధ్ రెడ్డి, జి.మధుసూదన్ రెడ్డి, నాగర్కర్నూల్లో ఎంపీ రాములు, లోకల్ బాడీస్ ఎమ్మెల్సీ కూచుకుళ్ల దామోదర్ రెడ్డి, ఎమ్మెల్యే డాక్టర్ కూచుకుళ్ల రాజేశ్ రెడ్డి, కల్వకుర్తిలో ఎమ్మెల్యే కసిరెడ్డి నారాయణ రెడ్డి, అచ్చంపేటలో ఎమ్మెల్యే డాక్టర్ వంశీకృష్ణ, షాద్నగర్లో ఎమ్మెల్సీ వాణీదేవి, వీర్లపల్లి శంకర్, నారాయణపేటలో మక్తల్, నారాయణపేట ఎమ్మెల్యేలు వాటికి శ్రీహరి, డాక్టర్ పర్నికారెడ్డి, గద్వాలలో ఎమ్మెల్సీ చల్లా వంశీచంద్ రెడ్డి, గద్వాల, అలంపూర్ ఎమ్మెల్యేలు బండ్ల కృష్ణమోహన్ రెడ్డి, విజేయులు తమ ఓటు హక్కును వినియోగించుకున్నారు.

పోలింగ్కు ఇద్దరు ఎంపీటీసీలు దూరం

బై పోల్స్లో 1,439 మంది ఓటర్లుండగా, 1,437 ఓట్లు పోలయ్యాయి. రెండు ఓట్లు పోల్ కాలేదు. ఈ రెండు ఓట్లు మహిళలవే. వీరిద్దరూ ఎంపీటీసీలే. ఇందులో ఒకరు మక్తల్ మండలం మంథన్గోడ్కు చెందిన బీజేపీ ఎంపీటీసీ గున్న సువర్ణ. ఈమెకు హెల్త్ ఇష్యూస్ ఉండడంతో ఏడాదిగా పూణెలో ఉంటున్నారు. ఎమ్మెల్సీ క్యాండిడేట్లు ఈమెకు డబ్బులు ఆఫర్ చేసి ఓటు వేయడానికి రావాలని కోరినా, బీజేపీ క్యాండిడేట్ పోటీలో లేకపోకపోవడంతో తాను పోలింగ్కు దూరంగా ఉంటున్నట్లు సమాధానమిచ్చినట్లు తెలిసింది. మరో ఎంపీటీసీ బిజినేపల్లి మండలం గుడ్లనర్వకు చెందిన ఎంపీటీసీ సురభి శారద. ఇమె కొంత కాలంగా అమెరికాలో ఉంటున్నారు. ఈ కారణంగానే ఓటింగ్కు దూరంగా ఉన్నట్లు తెలిసింది.