గంగాధర, వెలుగు: ప్రజా సమస్యలను పరిష్కరించడంలో రాష్ట్ర ప్రభుత్వం విఫలమైందని గ్రాడ్యుయేట్ ఎమ్మెల్సీ టి.జీవన్రెడ్డి ఆరోపించారు. కరీంనగర్ జిల్లా గంగాధర మండలంలోని నారాయణపూర్ రిజర్వాయర్ ముంపు గ్రామాలైన నారాయణపూర్, ఇస్తారిపల్లిని పీసీసీ అధికార ప్రతినిధి మేడిపల్లి సత్యంతో కలిసి శుక్రవారం ఆయన సందర్శించారు. రిజర్వాయర్కు గండి పడిన ప్రాంతాన్ని పరిశీలించి, తర్వాత గ్రామస్తులతో మాట్లాడారు. నారాయణపూర్ రిజర్వాయర్కు గండి పడి ఐదు నెలలవుతున్నా ప్రభుత్వంలో చలనం లేదని జీవన్రెడ్డి మండిపడ్డారు.
రిజర్వాయర్ కింద ఉన్న ఊళ్లను ముంపు గ్రామాలుగా ప్రకటించి, పునరావాస ప్యాకేజీ ఇవ్వాలని డిమాండ్ చేశారు. మత్తడి ఎత్తు పెంచితే ఆ ప్రభావం కట్టపై పడుతుందని చెప్పారు. ముంపు సమస్య పురావృతమైతే ప్రజల పరిస్థితి ఏమిటని ప్రశ్నించారు. స్థానిక ఎమ్మెల్యే రవిశంకర్ ప్రజల బతుకులతో ఆడుకోకుండా ఆదుకోవాలన్నారు. నెలరోజులు వరదనీటితో ఇబ్బందులు పడ్డామని నారాయణపూర్, ఇస్తారిపల్లి గ్రామస్తులు ఏడుస్తూ చెప్పారు. ఆయన వెంట కాంగ్రెస్ లీడర్లు మనోహర్, బుచ్చయ్య, ప్రభాకర్, కరీం, శ్రీనివాస్, నాగేందర్రెడ్డి, నజీర్, రాజేశం ఉన్నారు.
