అసెంబ్లీ ఎన్నికల ఎగ్జిట్ పోల్స్ బీఆర్ఎస్ కు నిరాశ కలిగించాయి. మూడోసారి అధికారంలోకి రావాలన్న ఆశలపై నీళ్లు చల్లాయి. హస్తం పార్టీకి భారీ మెజారిటీ ఇచ్చారు. ఎగ్జిట్ పోల్స్ అంచనాలు ఏ మేరకు నిజమవుతాయో రేపు మధ్యాహ్నానికి తేలనుంది. హైదరాబాద్ జూబ్లీహిల్స్‌లోని పార్టీ కేంద్ర కార్యాలయంతోపాటు జిల్లా కార్యాలయాల్లో సంబరాలు, ఉత్సాహ వాతావరణం కనిపించలేదు.
ఎగ్జిట్ పోల్స్ అంచనాలు తప్పని, తాము అధికారంలోకి వస్తామని కేటీఆర్ చెబుతున్నారు. ఈ నేపథ్యంలో ఎమ్మెల్సీ కల్వకుంట్ల కవిత తన అధికారిక ఎక్స్‌ ఖాతాలో ఎమోషనల్‌ ట్వీట్ చేశారు. కేసీఆర్‌ను హీరో అని అభివర్ణించారు. నా హీరో అంటూ కేసీఆర్‌తో ఓ చిన్న వీడియో క్లిప్‌ని కవిత షేర్ చేశారు. రచయితగా దర్శకుడిగా తెలుగు ఇండస్ట్రీలో తనదైన ముద్ర వేసిన త్రివిక్రమ్ శ్రీనివాస్‌ చెప్పిన డైలాగ్స్‌తో కేసీఆర్ నడుస్తూ వస్తున్న వీడియోను కవిత పోస్ట్ చేశారు. దీంతో ఈ వీడియో ఇప్పుడు వైరల్ గా మారింది.
