మోడల్ స్కూల్ టీచర్​ ఎస్​సీఈఆర్టీలో విలీనం

• సీఎంవో ఆదేశాల మేరకే జీవో ఇచ్చామంటున్న అధికారులు
• సీఎంవో చెప్తే రూల్స్ ​పట్టించుకోరా అని టీచర్​ సంఘాల ఫైర్

హైదరాబాద్, వెలుగు: మోడల్​ స్కూల్ లో పనిచేసే పోస్ట్ గ్రాడ్యుయేట్ టీచర్(పీజీటీ)ను ఏకంగా ఎస్​సీఈఆర్టీలో లెక్చరర్​గా శాశ్వతంగా విలీనం చేస్తూ రాష్ట్ర ప్రభుత్వం జీవో ఇవ్వడం వివాదాస్పదమైంది. ప్రస్తుతం ఆ టీచర్ సొసైటీ పరిధిలో పనిచేస్తుండగా, ఎస్​సీఈఆర్టీ పూర్తిగా గవర్నమెంట్ బాడీ. అదేదీ పట్టించుకోకుండా సర్కారు ఆర్డర్స్ ఇవ్వడంపై తీవ్ర విమర్శలు వస్తున్నాయి. 

మే 17న జీవో జారీ

రంగారెడ్డి జిల్లా పాలమాకుల మోడల్ స్కూల్​లో ఎ.శారద 2014 నుంచి పీజీటీగా పనిచేస్తోంది. అధికారికంగా ఆమె ఎస్​సీఈఆర్టీలో 2016 జులై13 నుంచి ఫారిన్ సర్వీస్​ కింద చేరింది. అప్పటికే ఆమె ఓరల్ ఆర్డర్స్ పై పనిచేసినట్టు అధికారులు చెప్తున్నారు. సాధారణంగా ఐదేండ్లు ఫారిన్ సర్వీస్ పూర్తయితే పేరెంట్ డిపార్ట్​మెంట్​కు పంపించాలి. కానీ స్కూల్ ఎడ్యుకేషన్ అధికారులు ఆ పని చేయడం లేదు. తాజాగా ఆ పీజీటీని ఏకంగా ఎస్​సీఈఆర్టీ లెక్చరర్​గా విలీనం చేస్తూ సర్కారు ఆదేశాలిచ్చింది. ఈ మేరకు అప్పటి విద్యాశాఖ కార్యదర్శి సందీప్ కుమార్ సుల్తానియా మే 17న జీవో రిలీజ్ చేశారు. దీంట్లోనూ సీఎంవో ఆదేశాలతోనే అంటూ పేర్కొనడం గమనార్హం. ఇది నిబంధనలకు విరుద్ధమని టీచర్ల సంఘాలు, అధికారులు చెబుతున్నారు.

నిబంధనలు గాలికి వదిలేశారు

మోడల్ స్కూల్​లో పీజీటీ కేడర్​ అంటే జూనియర్ లెక్చరర్ కంటే తక్కువ ర్యాంకు, నాన్ గెజిటెట్ పోస్టు. ఎస్​సీఈఆర్టీ లెక్చరర్ అంటే డిప్యూటీ డీఈవో, బీఈడీ కాలేజీల్లో సీనియర్ లెక్చరర్ కేడర్, ఇది గెజిటెడ్ పోస్టు. ఈ పోస్టులో మూడేండ్లు పనిచేస్తే డీఈవోగా ప్రమోషన్ వస్తుంది. బీఈడీ కాలేజీ ప్రిన్సిపల్​కు అర్హులు అవుతారు. ఈ రెండు పోస్టులను ఒకే గాటన ఎలా కట్టారనే ప్రశ్నలు ఇప్పుడు ఎదురవుతున్నాయి. సాధారణంగా సీటీఈ, బీఈడీ కాలేజీల్లో లెక్చరర్లు మాత్రమే డిప్యుటేషన్/ఓడీపై ఎస్​సీఈఆర్టీలో లెక్చరర్​గా పనిచేసేందుకు అర్హులు. ఎస్​సీఈఆర్టీ లెక్చరర్లకు యూజీసీ స్కేల్ అమలు చేస్తారు. అలాంటి పోస్టుల్లో జూనియర్​ను ఎలా పంపిస్తారనే ప్రశ్నలు వస్తున్నాయి. ఒకే డీఎస్సీ ద్వారా రిక్రూటైన గవర్నమెంట్, లోకల్ బాడీ టీచర్లే వేర్వేరుగా ఉంటారు. అలాంటిది ఏకంగా సొసైటీ టీచర్​ను ఎస్​సీఈఆర్టీలో విలీనం చేయడంపై విమర్శలు వస్తున్నాయి.