- కేసీఆర్ సభకు వచ్చినవాళ్లకు పైసల పంపిణీ
- సిరిసిల్లలో బహిరంగంగా పంచిన సర్పంచులు, కౌన్సిలర్లు
సిరిసిల్ల టౌన్, వెలుగు : సిరిసిల్ల జిల్లా కేంద్రంలో మంత్రి కేటీఆర్ ఆధ్వర్యంలో మంగళవారం నిర్వహించిన ప్రజా ఆశీర్వాద సభ కోసం వచ్చిన జనాలకు బహిరంగంగా డబ్బులు పంచారు. మంగళవారం సాయంత్రం నిర్వహించిన కేసీఆర్ సభకు సిరిసిల్ల టౌన్తో పాటు తంగళ్లపల్లి, ఎల్లారెడ్డిపేట, వేములవాడ, బోయినపల్లి, ముస్తాబాద్, గంభీరావుపేట తదితర మండలాల నుంచి 20 వేల మంది దాకా జనాన్ని తరలించారు. పబ్లిక్ను తరలించే బాధ్యతను పట్టణంలో కౌన్సిలర్లకు, గ్రామాల్లో సర్పంచులు, ఇతర లీడర్లకు అప్పగించారు. జనాల తరలింపు కోసం సోమవారమే ఆయా లీడర్లకు భారీ మొత్తంలో పార్టీ ఫండ్ చేరవేసినట్లు తెలిసింది.
ఈ క్రమంలో సభ ముగిశాక మహిళలు బీఆర్ఎస్ నాయకుల ఇండ్ల ముందు బారులు తీరారు. టౌన్ నుంచి వచ్చినవాళ్లకు ఒక్కొక్కరికి రూ.200, మండలాల నుంచి వచ్చినవారికి రూ.500 చొప్పున లీడర్లు బహిరంగంగా పంచారు. పలువురు అధికార పార్టీ కౌన్సిలర్లు, సర్పంచులు.. జనాలకు ఉదయం రాసిచ్చిన చీటీలు తీసుకుంటూ రూ.200, రూ.500 నోట్లను చేతిలో పెడ్తున్న వీడియోలు సాయంత్రం సోషల్మీడియాలో తిరిగాయి. తాను నియోజకవర్గంలో ప్రజలకు పైసలు, మందుబాటిళ్లు పంచనని చెప్పిన కేటీఆర్ఇలాకాలో ఇలా బహిరంగంగా బీఆర్ఎస్ లీడర్లు సభకు వచ్చిన జనానికి పైసలు పంచడం రాష్ట్రవ్యాప్తంగా చర్చనీయాంశంగా మారింది. దీనిపై ఎన్నికల సంఘం ఎలాంటి చర్యలు తీసుకుంటుందనేది ఆసక్తికరంగా మారింది.
