హైదరాబాద్, వెలుగు: సిటీ చుట్టుపక్కల జిల్లాలయిన మేడ్చల్– మల్కాజ్గిరి, సంగారెడ్డిలలోనే ఇండ్లు కొనుక్కోవడానికి ఎక్కువ మంది ఇష్టపడుతున్నారు. ఈ జిల్లాలలోనే కొత్త రిజిస్ట్రేషన్లు ఎక్కువగా జరుగుతున్నట్లు నైట్ఫ్రాంక్ రిపోర్టు ఇండియా తాజా రిపోర్టు వెల్లడించింది. ఇండ్ల అమ్మకాలు ఈ రెండు చోట్లే జోరుగా సాగుతున్నట్లు పేర్కొంది.
రిజిస్ట్రేషన్లలో టాప్ మేడ్చల్–మల్కాజ్గిరి
మేడ్చల్–మల్కాజ్గిరి జిల్లాలో ఇండ్ల రిజిస్ట్రేషన్లు అక్టోబర్ నెలలో అత్యధికంగా 46 శాతం దాకా ఉండగా, 36 శాతంతో రంగారెడ్డి జిల్లా రెండో ప్లేస్లో నిలిచినట్లు నైట్ఫ్రాంక్ ఇండియా రిపోర్ట్ తెలిపింది. రిజిస్ట్రేషన్లలో హైదరాబాద్ జిల్లా వాటా 14 శాతం. అక్టోబర్ 2022 నెలవారీ డేటాను ఈ సంస్థ గురువారం విడుదల చేసింది. హైదరాబాద్ సిటీలో ఇండ్ల రేట్లు ఏడాది కిందటితో పోలిస్తే 12 శాతం పెరిగాయని, సంగారెడ్డిలోనైతే ఏకంగా 37 శాతం పెరిగాయని రిపోర్ట్ పేర్కొంది. ఎక్కువ విలువైన ఇండ్లు సంగారెడ్డి జిల్లాలలోనే అమ్ముడవుతున్నాయని దీని వల్ల తెలుస్తుందని వివరించింది.ఇటీవలి కాలంలో హైదరాబాద్లో ఇండ్ల రేట్లు బాగా పెరిగిన విషయం తెలిసిందే. అంతేకాదు ఎక్కువ విలువైన ప్రాపర్టీలు కూడా చురుగ్గానే అమ్ముడవుతున్నాయి. అక్టోబర్ 2022లో హైదరాబాద్లో రూ. 2,237 కోట్ల విలువైన 4,597 రెసిడెన్షియల్ ప్రాపర్టీల రిజిస్ట్రేషన్లు జరిగినట్లు నైట్ఫ్రాంక్ డేటా తెలిపింది.
ఏడాది కిందటితో పోలిస్తే రిజిస్ట్రేషన్లు తగ్గినయ్..
ఈ ఏడాది మొదటి నుంచీ చూస్తే మొత్తం రూ. 27,509 కోట్ల విలువైన 56,003 రెసిడెన్షియల్ ప్రాపర్టీలు రిజిస్టరయ్యాయి. అయితే అంతకు ముందు ఏడాది ఇదే కాలంతో పోలిస్తే మాత్రం రిజిస్టరయిన రెసిడెన్షియల్ ప్రాపర్టీల సంఖ్యతోపాటు, వాటి విలువ కూడా తగ్గింది. అంతకు ముందు ఇదే కాలంలో హైదరాబాద్లో రూ. 30,108 కోట్ల విలువైన 67,685 రెసిడెన్షియల్ ప్రాపర్టీలు రిజిస్టరయినట్లు నైట్ఫ్రాంక్ వెల్లడించింది. సిటీ రెసిడెన్షియల్ మార్కెట్లో హైదరాబాద్, మేడ్చల్–మల్కాజ్గిరి, రంగారెడ్డి, సంగారెడ్డి జిల్లాలు ఉన్నాయి. మొత్తం రిజిస్ట్రేషన్లలో రూ.25 లక్షలు– రూ.50 లక్షల విలువైన రెసిడెన్షియల్ యూనిట్ల వాటా 51 శాతంగా ఉంది. ఈ సెగ్మెంట్ సుమారు 40 శాతం పెరిగినట్లు నైట్ఫ్రాంక్ రిపోర్ట్ తెలిపింది. మరోవైపు రూ. 25 లక్షల లోపు ఇండ్ల అమ్మకాల రిజిస్ట్రేషన్లు మాత్రం 22 శాతానికి తగ్గిపోయినట్లు పేర్కొంది. ఖరీదైన పెద్ద ఇండ్లకు డిమాండ్ అంతకు ముందులాగే కొనసాగుతున్నట్లు వివరించింది. రూ. 50 లక్షలకు మించిన రెసిడెన్షియల్ ప్రాపర్టీల రిజిస్ట్రేషన్లు అక్టోబర్ 2021తో పోలిస్తే ఈ అక్టోబర్లో 27 శాతానికి చేరాయని పేర్కొంది. 500 నుంచి 1,000 చదరపు అడుగుల రెసిడెన్షియల్ యూనిట్ల వాటా 21 శాతానికి పెరగ్గా, 1,000 చదరపు అడుగులకు మించిన రెసిడెన్షియల్ యూనిట్ల వాటా 76 శాతానికి తగ్గినట్లు నైట్ఫ్రాంక్ తాజా రిపోర్ట్ తెలిపింది. ఇండ్ల రుణాలపై వడ్డీ రేట్ల పెంపుదల, గ్లోబల్గా జియో–పొలిటికల్ టెన్షన్వంటి అంశాల ప్రభావం లేదని పేర్కొంది.
