-
యూపీలో మర్డర్ కేసు దోషి పట్టివేత
బరేలీ: హత్య కేసులో దోషిగా తేలిన వ్యక్తి తన మతం మార్చుకుని 36 ఏండ్లపాటు తప్పించుకుని తిరిగాడు. చివరకు పోలీసులకు దొరికి కటకటాలపాలయ్యాడు. యూపీలోని బరేలీకి చెందిన ప్రదీప్ సక్సేనా 1987లో తన సోదరుడిని హత్య చేశాడు. ఈ కేసులో కోర్టు ప్రదీప్ ను 1989లో దోషిగా తేల్చి శిక్ష వేసింది. తర్వాత పెరోల్ పై బయటకు వచ్చిన అతడు.. మొరాదాబాద్ కు పారిపోయాడు.
అక్కడ ముస్లింగా మారి తన పేరును అబ్దుల్ రహీంగా మార్చుకున్నాడు. గడ్డం పెంచుకున్నాడు. డ్రైవర్ గా పని చేస్తున్నాడు. అయితే.. గత నెల 16న అలహాబాద్ హైకోర్టులో ఆ కేసు ప్రస్తావన వచ్చింది. అతనిని 4 వారాల్లో పట్టుకోవాలని పోలీసులను హైకోర్టు ఆదేశించింది. దీంతో పోలీసులు కేసు ఫైల్స్ ను తిరగదోడి ప్రదీప్ కోసం గాలింపు ప్రారంభించారు.
అతని మరో సోదరుడిని విచారించగా.. ప్రదీప్ గురించి తెలిసింది. ఈ క్రమంలో ప్రదీప్ ఏదో పనిపై బరేలీకి వచ్చాడు. ‘‘నేను బయటకు వచ్చి 36 ఏండ్లవుతోంది. పోలీసులు నన్ను, నా కేసును మరిచిపోయి ఉంటారు” అని ప్రదీప్ ధీమాతో ఉన్నాడు. కానీ, పోలీసులు పక్కా ప్లాన్ తో అతనిని పట్టుకుని కోర్టులో హాజరుపరిచారు.
