మసీదుల్లో మహిళల ప్రవేశం కోరుతూ పూణేకు చెందిన దంపతులు సుప్రీంకోర్టును ఆశ్రయించారు. మొదట వారు పుణే లోని మహ్మదీయ జామా మసీద్ లో నమాజ్ చేసుకునేందుకు అనుమతివ్వాలని మసీదు పాలక వర్గాన్ని కోరారు. వారి విజ్ఞప్తిని పాలక కమిటీ తిరస్కరించడంతో ఆ దంపతులు సుప్రీంకోర్టును ఆశ్రయించారు.
మసీదుల్లో ముస్లిం మహిళలకు కూడా ప్రవేశం కల్పించాలని సుప్రీంకోర్టులో పిటీషన్ దాఖలు చేశారు. మసీదులలోకి అనుమతించకపోవడం మహిళల ప్రాథమిక హక్కులను కాలరాయడమే అంటూ తమ పిటిషన్ లో పేర్కొన్నారు ఆ దంపతులు. అలా చేయడం అర్టికల్ 14, 15, 21, 25, 29 లను ఉల్లంఘించడమేనని పిటిషన్ లో తెలిపారు.
ఈ పిటిషన్ పై విచారించిన సుప్రీంకోర్టు.. నేషనల్ ఉమెన్ కమిషన్, ఆల్ ఇండియా ముస్లిం పర్సనల్ లా బోర్డు, కేంద్ర ప్రభుత్వాలకు నోటీసులు జారీ చేసింది. తాజాగా శబరిమలై కేసులో సుప్రీంకోర్టు తీర్పును పరిగణలోకి తీసుకుంటూ ఈ పిటిషన్ విచారణను స్వీకరించామని జస్టిస్ ఎస్ ఏ బాబ్డే తెలిపారు.
