- లాంచ్ చేసిన కేంద్ర ఆరోగ్యమంత్రి మన్సుఖ్ మాండవీయ
- ప్రైవేటులో టీకా ధర రూ.800
న్యూఢిల్లీ : భారత్ బయోటెక్ అభివృద్ధిచేసిన నాసల్ కొవిడ్ వ్యాక్సిన్ ‘ బీబీవీ154 ఇన్కో వ్యాక్’ ఎట్టకేలకు మార్కెట్లోకి విడుదలైంది. రిపబ్లిక్ డే సందర్భంగా దీన్ని కేంద్ర ఆరోగ్యశాఖ మంత్రి మన్సుఖ్ మాండవీయ, సైన్స్అండ్ టెక్నాలజీ మంత్రి జితేంద్రసింగ్గురువారం లాంచ్ చేశారు. ముక్కు ద్వారా వేసే ఈ వ్యాక్సిన్ ను కేంద్ర, రాష్ట్ర ప్రభుత్వాలకు రూ.325కు, ప్రైవేటు మార్కెట్లో రూ.800కు విక్రయిస్తామని భారత్ బయోటెక్ ప్రకటించింది. ఇతరత్రా కొవిడ్ వ్యాక్సిన్ల రెండు డోసులు తీసుకున్నవారు ‘ బీబీవీ154 ఇన్కో వ్యాక్’ను బూస్టర్ డోసుగా వేయించుకోవచ్చు.
మొదటి డోసును వేసిన 28 రోజుల తర్వాత రెండో డోసు వేస్తారు. నాసల్ వ్యాక్సిన్ ఒక్కో డోసులో భాగంగా ఒక్కో ముక్కురంధ్రంలోకి చెరో నాలుగు వ్యాక్సిన్ డ్రాప్స్ వేస్తారు. అయితే ఇప్పటికే బూస్టర్/ప్రికాషన్ డోసు తీసుకున్న వారికి నాసల్ వ్యాక్సిన్ వేయరని భారత ప్రభుత్వ వ్యాక్సిన్టాస్క్ ఫోర్స్ చైర్మన్ డాక్టర్ ఎన్.కె.అరోరా ఇటీవల స్పష్టం చేశారు. కొవిన్ పోర్టల్లో నాలుగో వ్యాక్సిన్ డోసు బుకింగ్ ను సపోర్ట్ చేసేలా సెట్టింగ్స్ లేవని.. ఒకవేళ నాలుగో డోసును బుక్ చేసుకునే ప్రయత్నం చేసినా ఆటోమెటిక్ గా రెజెక్ట్ అవుతుందన్నారు. కాగా, 18 ఏళ్లకు పైబడిన వారంతా నాసల్ వ్యాక్సిన్ను వేయించుకోవచ్చు.