- ఆరో కన్సల్టేషన్ మీటింగ్ మినిట్స్ కన్ఫర్మేషన్ నోట్లో ఎన్డబ్ల్యూడీఏ స్పష్టీకరణ
- తెలంగాణ కోరినట్టూ ఇచ్చేందుకు రెడీ.. తొలి దశలో మా ప్రతిపాదనకు ఒప్పుకోవాలి
- రెండో దశలో తెలంగాణకు అదనపు కేటాయింపులు తప్పకుండా చేస్తం
- 200 టీఎంసీలను అవసరాలకు అనుగుణంగా..
- వాడుకునే స్వేచ్ఛ తెలంగాణకు ఉందని వెల్లడి
హైదరాబాద్, వెలుగు: గోదావరి–కావేరి లింక్లో భాగంగా అన్ని సభ్య రాష్ట్రాలకు కొంచెం ఎక్కువో.. కొంచెం తక్కువో నీటి కేటాయింపులు చేస్తామని, జల ప్రయోజనాల దృష్ట్యా సర్దుకుపోవాలని నేషనల్ వాటర్ డెవలప్మెంట్ ఏజెన్సీ (ఎన్డబ్ల్యూడీఏ) స్పష్టం చేసింది.
తెలంగాణ రాష్ట్ర ప్రభుత్వం గోదావరి–కావేరి లింక్ ద్వారా తరలించే 148 టీఎంసీల్లో సగం వాటాగా 74 టీఎంసీలు కోరుతున్నదని, దానిపై ఆలోచన చేస్తామని పేర్కొంది. అందుబాటులో ఉన్న జలాలను సముద్రంలో వృథాగా కలవనివ్వకుండా.. సాగు, తాగు అవసరాల కోసం వినియోగించుకునేలా నదుల అనుసంధానాన్ని చేపట్టినట్టు తెలిపింది.
ఫేజ్1లో భాగంగా తాము చెప్పిన ప్రతిపాదనకు (50 టీఎంసీలు) అంగీకరించాలని, ప్రాజెక్ట్ ఫేజ్2లో అదనంగా నీటిని తప్పకుండా కేటాయిస్తామని హామీ ఇచ్చింది. ఆగస్టు 22న జలసౌధలో జరిగిన ఆరో కన్సల్టేషన్ మీటింగ్కు సంబంధించి ఈ నెల 10న మీటింగ్ మినిట్స్ను ఎన్డబ్ల్యూడీఏ విడుదల చేసింది. తాజాగా ఆ మినిట్స్ కన్ఫర్మేషన్ను జారీ చేసింది.
గోదావరిలో తెలంగాణకు కేటాయించిన నీళ్లలో ఒక్క చుక్కనూ గోదావరి–కావేరి లింక్లో వాడుకోబోమని స్పష్టం చేసింది. ఇక, గోదావరి మీద కడుతున్న ప్రాజెక్టులకు అనుమతుల విషయం తమ పరిధిలో లేదని ఎన్డబ్ల్యూడీఏ పేర్కొంది. తెలంగాణ చెబుతున్నట్టుగా.. చత్తీస్గఢ్ నుంచి అనుమతి తీసుకున్నాక ఒప్పందాలకు అనుగుణంగానే 148 టీఎంసీలను జీసీ లింక్లో తరలిస్తామని స్పష్టం చేసింది.
హిమాలయాల నుంచి నీటి తరలింపు, మహానది గోదావరి లింక్ను చేపట్టే వరకు.. ఇది కేవలం ఓ తాత్కాలిక ఒప్పందం మాత్రమేనని స్పష్టం చేసింది. టెక్నికల్ అడ్వైజరీ కమిటీ అనుమతులు పొందిన ప్రాజెక్టులన్నింటికీ గోదావరి కావేరి లింక్లో ప్రాధాన్యం ఇస్తామని తెలిపింది.
జీసీ లింక్ ద్వారా సమ్మక్కసాగర్ బ్యారేజీ నీటి వినియోగంపై పడే ప్రభావాన్ని ఇప్పటికే సిమ్యులేషన్ స్టడీస్ ద్వారా అంచనా వేశామని, ఆ బ్యారేజీ దిగువన పడే ప్రభావంపై స్టడీస్ చేసే విషయం తమ పరిధిలోకి రాదని ఎన్డబ్ల్యూడీఏ తేల్చి చెప్పింది.
ఆ స్వేచ్ఛ తెలంగాణకు ఉంది..
జీసీ లింక్లో రాష్ట్రానికి 74 టీఎంసీల వాటా ఇవ్వడంతో పాటు.. తాగు, సాగునీటి అవసరాల కోసం 200 టీఎంసీలను జీసీ లింక్ ద్వారా తరలించుకునేందుకు అవకాశం ఇవ్వాలన్న తెలంగాణ విజ్ఞప్తికి ఎన్డబ్ల్యూడీఏ సానుకూలంగా స్పందించింది. అవసరానికి అనుగుణంగా ఆ నీటిని వాడుకునే స్వేచ్ఛ తెలంగాణకు ఉందని స్పష్టం చేసింది. సమగ్రమైన సిమ్యులేషన్ స్టడీస్ చేసిన తర్వాత కచ్చితమైన నీటి నిల్వ అవసరాలను ఖరారు చేసేందుకు వీలవుతుందని తెలిపింది.
నీటిని తరలించే కన్వేయింగ్ సిస్టమ్, అలైన్మెంట్ను ఫీజిబిలిటీ స్టడీ టైంలో చేసిన సర్వే, ఇన్వెస్టిగేషన్స్ ఆధారంగా నిర్ణయించామని, దానిని సభ్య రాష్ట్రాలకు పంపించామని గుర్తు చేసింది. నీటి తరలింపు దూరాన్ని తగ్గించేలా అలైన్మెంట్లో ఏవైనా మార్పులు చేయాల్సి వస్తే.. ఒప్పందాలు పూర్తయిన తర్వాత వివరణాత్మక అధ్యయనం చేయాల్సి ఉంటుందని స్పష్టం చేసింది. ప్రస్తుత చట్టాలకు అనుగుణంగానే పరిహారాలు అందజేస్తామని తెలిపింది.
తెలంగాణకు కృష్ణా బేసిన్లో రెండు రిజర్వాయర్లు కట్టివ్వాలన్న ప్రతిపాదనపై.. దానిపైనా అగ్రిమెంట్ల తర్వాతే స్టడీ చేయాల్సి ఉంటుందని పేర్కొంది. దిగువన ఉన్న ప్రాజెక్టులపై ఎలాంటి ప్రభావం పడకుండా, నీటి కొరత రాకుండా చూసుకుంటూనే జీసీ లింక్లో నీటిని తరలిస్తామని తెలిపింది.
