- ‘సుచిర్ ఇండియా’ సంకల్ప్ దివస్ పురస్కారాల ప్రదానం
హైదరాబాద్ సిటీ, వెలుగు: ప్రకృతి పరిరక్షణ ప్రతి ఒక్కరి బాధ్యత అని మాజీ ఉపరాష్ట్రపతి వెంకయ్య నాయుడు అన్నారు. శుక్రవారం శిల్పారామంలో సుచిర్ ఇండియా ఫౌండేషన్ నిర్వహించిన సంకల్ప దివస్ కార్యక్రమానికి ఆయన ముఖ్య అతిథిగా హాజరయ్యారు. వివిధ రంగాల్లో సామాజిక సేవ చేస్తున్న వారికి పురస్కారాలను ప్రదానం చేశారు.
ఈ సందర్భంగా ఆయన మాట్లాడుతూ.. సేవ అనేది ఒక బాధ్యతగా హృదయంతో చేయాలన్నారు. వికసిత భారత్ అంటే కేవలం అభివృద్ధి మాత్రమే కానది, ప్రకృతి పరిరక్షణ కూడా అని అర్థం చేసుకోవాలన్నారు. సంకల్ప కిరణ్ పురస్కారాన్ని అందుకుంటున్న జాదవ్ పాయెంగ్ ప్రకృతి పరిరక్షణకు జీవితాన్ని అంకితం చేశారని, ఫారెస్ట్ మాన్ ఆఫ్ ఇండియా గా సుప్రసిద్ధులయ్యారన్నారు.
అస్సాంలో వన్యప్రాణుల కోసం 1400 ఎకరాల్లో అడవిని సృష్టించిన మహనీయుడన్నారు. కార్యక్రమంలో బాలజీ తారిణి, ఖ్వాజా మొహియుద్దీన్, సి. ప్రవీణ్ కుమార్ యాదవ్, పోలిన చంద్రశేఖర్ కు సంకల్ప సంజీవని పురస్కారాలు అందజేశారు.
