- విదేశాల రెస్క్యూ టీంలు.. ముందు వద్దని..
- తర్వాత పంపాలని కోరిన నేపాల్
- విపత్తు తీవ్రతతో నేపాలీ బృందాలకు కష్టంగా సహాయక చర్యలు
- అందుకే మనసు మార్చుకుని సాయం కోసం విజ్ఞప్తి
- వెంటనే స్పందించిన భారత్
కఠ్మాండు/న్యూఢిల్లీ: సహాయక చర్యల కోసం విదేశాల రెస్క్యూ టీమ్ల అవసరం తమకు లేదని, కేవలం విరాళాలు ఇస్తే చాలని నేపాల్ శుక్రవారం ముందుగా విజ్ఞప్తి చేసింది. కానీ, ఆ తర్వాత విపత్తు తీవ్రత దృష్ట్యా కేవలం నేపాలీ బృందాలు, పరికరాలతో సహాయక చర్యలు చేపట్టడం కష్టసాధ్యమని భావించి, మనసు మార్చుకుంది. ముందుగా గాలింపు, రెస్క్యూ ఆపరేషన్ల కోసం విదేశీ బృందాలను అనుమతించేది లేదని నేపాల్ స్పష్టం చేసింది. విపత్తును ఎదుర్కొనే పూర్తి సామర్థ్యం తమ భద్రతా సంస్థలకు ఉందని తెలిపింది.
భారత్, చైనా, అమెరికా సహా పలు దేశాలు రెస్క్యూ బృందాలను పంపేందుకు ముందుకొచ్చినా నేపాల్ సున్నితంగా తిరస్కరించింది. అయితే సహాయక సామగ్రి, ఆర్థిక విరాళాలు, పునరావాస సాయాన్ని మాత్రం స్వీకరిస్తామని వెల్లడించింది. 'పొరుగు దేశాలకు ప్రాధాన్యత' ఇస్తూ భారత్ ఇప్పటికే భారీగా మానవతా సాయాన్ని, బెయిలీ వంతెనలను అందించింది. అయితే 2015 భూకంపం సమయంలో విదేశీ బృందాల రాకతో లాజిస్టికల్, సమన్వయ సమస్యలు తలెత్తాయి. దీంతో విదేశీ రెస్క్యూ బృందాలను తిరస్కరించింది.
ఈసారి సొంత బలగాలకే బాధ్యతలు అప్పగించాలని ప్రధాని బాలెన్ షా సర్కార్ నిర్ణయించింది. విదేశీయుల ఆచూకీ కోసం ఈఆర్టీని (అత్యవసర ప్రతిస్పందన బృందం) ఏర్పాటు చేసి.. విరాళాల కోసం సింగిల్ విండో విధానాన్ని అందుబాటులోకి తెచ్చింది. ఈ నేపథ్యంలో వరద బాధితులను ఆదుకునేందుకు నేపాల్ ప్రధాని బాలెన్ షాతో పాటు మంత్రులందరూ తమ ఒక నెల జీతాలను ప్రధానమంత్రి విపత్తు సహాయ నిధికి విరాళంగా ప్రకటించారు.
అలాగే, "మాకు సాయం అసలే వద్దు అని కాదు, మా సెక్యూరిటీ సిస్టమ్ భలే స్ట్రాంగ్గా ఉంది, ప్రెసెంట్ బాగా వర్క్ చేస్తోంది. ఒకవేళ నేపాల్కు ఏదైనా స్పెషల్ హెల్ప్ లేదా స్పెషలైజ్డ్ టెక్నాలజీ కావాల్సి వస్తే అప్పుడు అడుగుతాం" అని నేపాల్ ఫారిన్ మినిస్ట్రీ ప్రతినిధి లోక్ బహదూర్ ఛెత్రి స్పష్టం చేశారు. కాగా, నేపాల్ రిక్వెస్ట్ మేరకు అదనపు సాయం అందించేందుకు రెడీ అవుతున్నట్లు భారత విదేశాంగ శాఖ వెల్లడించింది. మెడికల్ టీమ్లు, బెయిలీ బ్రిడ్జిలు, రిలీఫ్ మెటీరియల్, ఎక్విప్మెంట్లను పంపనున్నట్టు తెలిపింది.
