- హెచ్యూజే, టీడబ్ల్యూజేఎఫ్ కార్యవర్గం డిమాండ్
ముషీరాబాద్, వెలుగు: జర్నలిస్టులకు కొత్త అక్రిడిటేషన్ కార్డులు వెంటనే మంజూరు చేయాలని హైదరాబాద్ యూనియన్ ఆఫ్ జర్నలిస్ట్స్ కార్యవర్గం(హెచ్యూజే--టీడబ్ల్యూజేఎఫ్) డిమాండ్ చేసింది. 18 నెలలుగా పొడిగింపు స్టిక్కర్లతోనే సమాచార శాఖ కాలం గడుపుతున్నదని ఆవేదన వ్యక్తం చేసింది. ప్రజాప్రభుత్వం అధికారంలోకి వచ్చి రెండేండ్లు గడుస్తున్నప్పటికీ అక్రిడిటేషన్ పాలసీని ప్రకటించకపోవడం జర్నలిస్టులపై ప్రభుత్వ నిర్లక్ష్య వైఖరికి నిదర్శనమని పేర్కొంది.
శుక్రవారం చిక్కడపల్లి త్యాగరాయ గానసభ లో హెచ్యూజే అధ్యక్షుడు బి. అరుణ్ కుమార్ అధ్యక్షతన కార్యవర్గ సమావేశం జరిగింది. వృత్తిపరంగా జర్నలిస్టులు ఎదుర్కొంటున్న సమస్యలతో పాటు ఇండ్ల స్థలాలు, హెల్త్ కార్డులు, ఇతర సమస్యలపై చర్చించారు. జర్నలిస్టులకు ఇండ్ల స్థలాల విషయంలో ప్రభుత్వం ప్రత్యేక పాలసీ తీసుకురావాలని కోరారు. డిసెంబర్ నెలాఖరులో హెచ్యూజే మహాసభలు నిర్వహిస్తామని ప్రకటించారు.
సంఘ నియమాలు ఉల్లంఘించిన సభ్యుడు మామిడి సోమయ్య ప్రాథమిక సభ్యత్వం రద్దు చేయాలని తీర్మానించారు. ఈ సమావేశానికి ముఖ్యఅతిథిగా టీడబ్ల్యూజేఎఫ్ సీనియర్ ఉపాధ్యక్షులు, అడ్ హక్ కమిటీ కన్వీనర్ పిల్లి రాంచందర్ హాజరు కాగా, వర్కింగ్ ప్రెసిడెంట్ గండ్ర నవీన్, ట్రెజరర్ రాజశేఖర్, ఫెడరేషన్ రాష్ట్ర నాయకులు పాల్గొన్నారు.
