V6 News Velugu

డిజిటిల్ బ్యాంకులు తేవాలి

V6 Velugu Posted on Nov 25, 2021

న్యూఢిల్లీ: పూర్తి స్థాయి డిజిటల్​ బ్యాంకులు తేవాలని నీతి ఆయోగ్​ ప్రపోజ్​ చేస్తోంది. ఫిజికల్​ బ్రాంచులు లేకుండా ఇంటర్​నెట్​ ఆధారంగా సేవలను ఈ డిజిటల్​ బ్యాంకులు అందిస్తాయని చెబుతోంది. డిజిటల్​ బ్యాంకులు– లైసెన్సింగ్​, నియంత్రణ పేరిట ఒక డిస్కషన్​ పేపర్​ను నీతి ఆయోగ్​ తెచ్చింది. దేశంలో పూర్తి స్థాయి డిజిటల్​ బ్యాంకులు కార్యకలాపాలు చేపట్టడానికి తగిన రోడ్​ మ్యాప్​ను ఇందులో సూచించింది. బ్యాంకింగ్​ రెగ్యులేషన్​ యాక్ట్​, 1949లో పొందుపరిచిన బ్యాంకుల తరహాలోనే డిజిటల్​ బ్యాంకులూ ఉండాలని పేర్కొంది. సాధారణ బ్యాంకులలాగే డిజిటల్​ బ్యాంకులూ డిపాజిట్లు తీసుకుంటాయని, అప్పులు ఇస్తాయని, బ్యాంకింగ్​ రెగ్యులేషన్​ యాక్ట్​ పరిమితుల మేరకు అన్ని రకాల సర్వీస్​లనూ ఇస్తాయని తెలిపింది. సాధారణ బ్యాంకులకూ డిజిటల్​ బ్యాంకులకూ ఉండే తేడా అల్లా బ్రాంచులు లేకపోవడమేనని పేర్కొంది. ఇప్పటికే పాతుకుపోయిన పాత వాటిని ఎలా ఛాలెంజ్​ చేయొచ్చనేది యూపీఐ ద్వారా తేలిపోయిందని, డిజిటల్​ ఇన్​ఫ్రాస్ట్రక్చర్​ మన దేశంలో మెరుగ్గా ఉందని అభిప్రాయపడింది. దేశంలో ఆధార్​ ఆథంటికేషన్లు 55 లక్షల కోట్లను, యూపీఐ ట్రాన్సాక్షన్లు రూ. 4 లక్షల కోట్లను దాటేయడాన్ని నీతి ఆయోగ్​ ఈ సందర్భంగా ఉదహరించింది. సొంత బ్యాంకింగ్​ ఫ్రేమ్​వర్క్​ను తయారు చేసుకునే దిశలో దేశం ముందడుగు వేస్తోందని పేర్కొంది. డిజిటల్​ బ్యాంకుల ఏర్పాటుకు అవసరమైన టెక్నాలజీ మన వద్ద అందుబాటులో ఉందని, ​ రెగ్యులేటరీ ఫ్రేమ్​వర్క్​ కోసం బ్లూప్రింట్​ తయారుచేయాలని నీతి ఆయోగ్​ సూచించింది. తొందర పడకుండా తగిన జాగ్రత్తలతోనే ఈ రెగ్యులేషన్స్‌​ను తేవొచ్చని తెలిపింది. సాధారణ బ్యాంకులకు లైసెన్స్​ను ఆర్​బీఐ ఇస్తుందని, డిజిటల్​ బ్యాంకులకూ అదే కొనసాగుతుందని, కాకపోతే మరొక డిజిటల్​ బ్యాంకులకు లైసెన్స్​ ఇవ్వడానికి మరొక స్టెప్​ చేరిస్తే సరిపోతుందని పేర్కొంది.

బ్యాంక్​ బ్రాంచ్​లు కొనసాగుతాయ్..కానీ
డిజిటల్​ బ్యాంకింగ్​ ఊపందుకున్నా ఫిజికల్​ బ్రాంచీలు కొనసాగుతాయని బ్యాంకింగ్​ ఎక్స్​పర్టులు చెబుతున్నారు. ఎందుకంటే, ఎక్కువ మంది కస్టమర్లు బ్రాంచ్​లకు వచ్చి ట్రాన్సాక్షన్లు జరపడానికే ఇష్టపడుతున్నారని పేర్కొంటున్నారు. డిజిటల్​ ఛానెల్స్​ను మరింతగా వాడేలా కస్టమర్లకు అవగాహనను బ్యాంకులు కల్పించాలని సూచిస్తున్నారు. డిజిటల్​ బ్యాంకింగ్​ సులభమనే విషయం కస్టమర్లకు తెలియాలన్నారు. భవిష్యత్​లోనూ బ్యాంకుల బ్రాంచులు పూర్తిగా కనుమరగవ్వవని ఎస్‌బీఐ ఎండీ​ అశ్వని కే తివారి చెప్పారు. బ్రాంచులకు వచ్చి తమ ట్రాన్సాక్షన్లు  పూర్తి చేయాలనుకునే వారు చాలా మంది ఉన్నారన్నారు.

Tagged digital banking, niti aayog, digital banks, full stack digital banks