- 55.5 శాతం మంది మహిళలూ సతమతం
- ‘న్యూట్రిషన్ ప్రొఫైల్’లో నీతి ఆయోగ్ వెల్లడి
- 16 లక్షల మంది పిల్లల్లో, 53 లక్షల మంది మహిళల్లో ఎనీమియా
- తక్కువ బరువున్న మహిళలు 17.7 లక్షలు
న్యూఢిల్లీ, వెలుగు: రాష్ట్రంలో పిల్లలు, మహిళల్లో రక్తహీనత సమస్య పెరిగిందని నీతి ఆయోగ్ వెల్లడించింది. గత నాలుగేళ్లలో ఐదేండ్లలోపు చిన్నారుల్లో 9 శాతం, గర్భిణుల్లో 5 శాతం ఈ సమస్య ఎక్కువైందని తెలిపింది. పిల్లల్లో నాలుగేళ్ల కింద 61 శాతం మంది రక్తహీనతతో బాధపడగా ఇప్పుడు 70 శాతం మందికి పైగా ఇబ్బంది పడుతున్నారని.. మహిళల్లో 52.5 శాతం నుంచి 55.5 శాతానికి ఈ సమస్య పెరిగిందని చెప్పింది. పిల్లలు, మహిళల్లో పోషకాహారలోపం సమస్యలు కూడా రాష్ట్రంలో ఎక్కువయ్యాయంది. రంగారెడ్డి, మహబూబ్‌‌‌‌నగర్‌, హైదరాబాద్, ఆదిలాబాద్‌ జిల్లాల్లో ఈ సమస్య ఎక్కువుందని వివరించింది. మహిళల ఎడ్యుకేషన్లో రాష్ట్రంలో హైదరాబాద్ చివరి స్థానంలో ఉందని చెప్పింది. 15 నుంచి 49 ఏండ్ల మధ్య మహిళల్లో, 5 ఏండ్ల లోపు పిల్లల్లో స్థూలకాయం నియంత్రణ, 15 నుంచి 54 ఏండ్ల మధ్య పురుషుల్లో రక్తపోటు నియంత్రణలోనూ హైదరాబాద్ లాస్ట్లో ఉందంది.19 రాష్ట్రాలు, కేంద్ర పాలిత ప్రాంతాలకు సంబంధించిన ‘న్యూట్రిషన్ ప్రొఫైల్’ను నీతి ఆయోగ్ శుక్రవారం విడుదల చేసింది. దేశంలో పోషకాహార లోపం కారణంగా చిన్నారులు, మహిళలు ఎదుర్కొంటున్న సమస్యలపై ఇంటర్నేషనల్‌ ఫుడ్‌ పాలసీ రీసెర్చ్‌ ఇన్స్టిట్యూట్‌, ఇండియన్‌ ఇన్స్టిట్యూట్‌ ఆఫ్‌ పాపులేషన్‌ సైన్సెస్‌, యూనిసెఫ్, ఇన్స్టిట్యూట్‌ ఆఫ్‌ ఎకనమిక్‌ గ్రోత్‌ కలిసి రిపోర్టును రెడీ చేశాయి.
పురుషుల్లో 8% పెరిగిన ఉబకాయం
పిల్లల్లో 2015–-16లో పెరుగుదల లోపం 28 శాతం ఉండగా 2019–-20కి 33 శాతానికి పెరిగిందని, తక్కువ బరువు (అండర్‌ వెయిట్) 28 నుంచి 32 శాతానికి పెరిగిందని నీతి ఆయోగ్వివరించింది. మహిళల్లో తక్కువ బరువు సమస్య కాస్త తగ్గిందని, గతంలో 23 శాతం ఉండగా 19 శాతానికి పడిపోయిందని తెలిపింది. 2016-–2020 మధ్య ఐదేండ్ల లోపు చిన్నారుల్లో 5 శాతం.. హైట్ కు తగ్గ వెయిట్, వెయిట్ కు తగ్గ హైట్ లేరని గుర్తించినట్లు పేర్కొంది. పిల్లల్లో తక్కువ బరువు సమస్య ఈ నాలుగేళ్లలో 4 శాతం తగ్గిందని చెప్పింది. మహిళలల్లోనూ ఈ సమస్య 4 శాతం తగ్గిందని, అయితే రక్తహీనత 1 శాతం పెరిగిందని తెలిపింది. మహిళల్లో అధిక బరువు, ఊబకాయం సమస్య 1 శాతం పెరగ్గా.. పురుషుల్లో 8 శాతం ఎక్కువైందని స్పష్టం చేసింది.
53 లక్షల మంది మహిళల్లో ఎనీమియా
రాష్ట్రంలోని 16,34,760 మంది ఐదేండ్లలోపు చిన్నారులు రక్తహీనత సమస్యను ఎదుర్కొంటున్నారని.. 15 నుంచి 49 సంవత్సరాల వయసులోని మహిళల్లో 53,53,541 మంది ఈ సమస్యతో బాధపడుతున్నారని నీతి ఆయోగ్ తెలిపింది. 97,473 మంది గర్భవతుల్లోనూ రక్తహీనత లోపం గుర్తించామంది. ఐదేండ్ల లోపు చిన్నారుల్లో వయసుకు తగ్గ ఎత్తు లేకపోవడం రాష్ట్రంలో ప్రధానంగా సమస్యగా ఉందని పేర్కొంది. 2019–20 లెక్కల ప్రకారం రాష్ట్రంలో దాదాపు 8.82 లక్షల మంది చిన్నారుల్లో ఈ సమస్యను గుర్తించినట్లు స్పష్టం చేసింది. రంగారెడ్డి జిల్లాలో 1.73 లక్షల మంది చిన్నారులు (అత్యధికంగా) ఈ సమస్యతో బాధపడుతున్నారంది. ఎత్తుకు తగ్గ బరువు లేని లోపంతో 5,18,647 మంది చిన్నారులు ఇబ్బందిపడుతున్నారని, నల్గొండలో అత్యధికంగా 77,602 మంది ఉన్నారని వివరించింది. 2,06,206 మంది పిల్లలు ఎత్తుకు తగ్గ బరువు లేక అనారోగ్యానికి గురవుతున్నారంది. ఈ కేటగిరీలోనూ నల్గొండ టాప్ లో ఉందని చెప్పింది. ఊబకాయంతో రాష్ట్రంలో 8,06,558 మంది ఐదేళ్లలోపు చిన్నారులు బాధపడుతున్నారని, ఇందులో మొదటి స్థానంలో రంగారెడ్డి (1,35,070) ఉందని వివరించింది. 15 -నుంచి 49 ఏండ్ల మధ్య వారిలో 17.76 లక్షల మంది మహిళలు తక్కువ బరువుతో ఉన్నట్లు నీతి ఆయోగ్ పేర్కొంది. మహబూబ్‌‌‌‌నగర్‌ (2,76,716)లో ఈ సమస్య ఎక్కువుందని తెలిపింది.
