- సీఈఓ సుదర్శన్ రెడ్డి వెల్లడి
హైదరాబాద్, వెలుగు : జూబ్లీహిల్స్ అసెంబ్లీ నియోజకవర్గం ఉప ఎన్నికలో వినియోగించిన ఈవీఎంల తనిఖీ కోసం ఒక్క దరఖాస్తు కూడా రాలేదని రాష్ట్ర ప్రధాన ఎన్నికల కమిషనర్ సి.సుదర్శన్ రెడ్డి తెలిపారు. ఫలితాలు ప్రకటించిన తర్వాత 14 నుంచి 21 వరకు జిల్లా ఎన్నికల రిటర్నింగ్ అధికారికి ఎలాంటి దరఖాస్తులు రాలేదని శుక్రవారం ఒక ప్రకటనలో ఆయన వెల్లడించారు.
రెండు, మూడో స్థానాల్లో నిలిచిన అభ్యర్థులు కోరితే మొత్తం ఈవీఎంలలో 5 శాతం వరకు బ్యాలెట్ యూనిట్, కంట్రోల్ యూనిట్ వీవీపాట్‌లను తయారీ సంస్థల ఇంజినీర్ల బృందంతో తనిఖీ చేసి ధ్రువీకరించే అవకాశం ఉందని చెప్పారు. ఇందుకోసం ఫలితాల తేదీ నుంచి ఏడు రోజుల్లోపు రాతపూర్వకంగా దరఖాస్తు చేయాల్సి ఉంటుందన్నారు. ఎన్నికల నిర్వహణ మొత్తం ఎన్నికల సంఘం నిర్దేశించిన మార్గదర్శకాలతో పారదర్శకంగా జరిగిందని పేర్కొన్నారు.
