బ్యాక్ వాటర్తో పంటలు మునిగిన రైతులకు పరిహారం ఇయ్యలే
జైపూర్, వెలుగు: సీఎం కేసీఆర్ రూ.లక్షా 20 వేల కోట్లతో కాళేశ్వరం ప్రాజెక్టు కట్టి ఒక్క ఎకరానికీ నీళ్లియ్యలేదని, తన ఫామ్హౌస్కు మాత్రం పట్టుకుపోతున్నారని వైఎస్ఆర్టీపీ చీఫ్షర్మిల విమర్శించారు. కాళేశ్వరం బ్యారేజీల బ్యాక్ వాటర్తో ఆ ప్రాంతంలో 40 వేల ఎకరాల్లో పంటలు మునిగాయని, మూడేండ్లుగా పైసా పరిహారం ఇయ్యలేదని ఆమె మండిపడ్డారు. అప్పుల బాధతో రైతులు ఆత్మహత్యలు చేసుకుంటున్నారని వాపోయారు. కమీషన్ల కోసమే కేసీఆర్ ఈ ప్రాజెక్టు కట్టి రూ.70వేల కోట్లకు పైగా దోచుకున్నారని ఆరోపించారు. బుధవారం మంచిర్యాల జిల్లా చెన్నూర్ నియోజకవర్గంలో ఆమె పాదయాత్ర చేశారు.
భీమారం మండలం పోలంపల్లిలో మొదలైన యాత్ర జైపూర్, పెగడపల్లి, గంగిపల్లి, ఎల్కంటి, శెట్పల్లి క్రాస్ మీదుగా టేకుమట్ల వరకు సాగింది. టేకుమట్లలో జరిగిన బహిరంగసభలో ఆమె మాట్లాడారు. జైపూర్లోని సింగరేణి థర్మల్ పవర్ ప్లాంట్ కోసం రైతుల భూములు గుంజుకున్నారన్నారు. పవర్ ప్లాంట్ కు భూములు త్యాగం చేసిన రైతులు అందులో లేబర్ పనిచేస్తున్నారని, ఎదురు తిరిగిన వాళ్లను తొలగిస్తున్నారని మండిపడ్డారు. ఓపెన్ కాస్టులతో తెలంగాణ బొందలగడ్డగా మారిందని ఆనాడు మొసలికన్నీరు కార్చిన కేసీఆర్.. అధికారంలోకి వచ్చాక ఓపీసీలను తిరిగి తెరుస్తున్నారని చెప్పారు. వైఎస్సార్ పథకాలను కేసీఆర్ భ్రష్టుపట్టించారన్నారు. 8 ఏండ్లలో ఎవరికీ న్యాయం చేయలేదన్నారు.. ఎమ్మెల్యే బాల్క సుమన్.. కేసీఆర్, కేటీఆర్కు బానిసగా మారాడని ఫైరయ్యారు.
