రాష్ట్రపతి ఎన్నికకు ఇయ్యాల నోటిఫికేషన్​

• వైఎస్​ఆర్​సీపీ, బీజేడీ మద్దతు కోసం బీజేపీ ప్రయత్నాలు
• ఉమ్మడి అభ్యర్థిపై ఇయ్యాల ప్రతిపక్షాల సమావేశం

న్యూఢిల్లీ, వెలుగు: రాష్ట్రపతి ఎన్నికకు బుధవారం నోటిఫికేషన్​ విడుదల కానుంది. నామినేషన్ల ప్రక్రియ కూడా షురూ కానుంది. ఈ నేపథ్యంలోనే అధికార, ప్రతిపక్షాలు తమ తమ అభ్యర్థుల విజయానికి కసరత్తులూ మొదలు పెట్టేశాయి. ఎన్నికను ఏకగ్రీవం చేసేందుకు బీజేపీ ప్రయత్నిస్తుండగా.. ప్రతిపక్షాల తరఫున అభ్యర్థిని నిలబెట్టేందుకు మమత బెనర్జీ పావులు కదుపుతున్నారు. మెజారిటీకి స్వల్ప దూరంలో ఉండడంతో కాంగ్రెస్​ సహా తటస్థ పార్టీలతో చర్చలు జరిపేందుకు రక్షణ మంత్రి రాజ్​నాథ్​ సింగ్​, బీజేపీ జాతీయ అధ్యక్షుడు జేపీ నడ్డాకు ప్రధాని నరేంద్ర మోడీ బాధ్యతలు అప్పగించారు. వైఎస్​ఆర్​సీపీ లేదా బీజేడీల మద్దతుతో ఎన్నికల్లో గట్టేందుకు బీజేపీ ప్రయత్నిస్తోంది. దీనికి సంబంధించి ఏపీ సీఎం జగన్​, ఒడిశా సీఎం నవీన్​ పట్నాయక్​తో మోడీ చర్చలు జరిపారు. ఇటు ప్రతిపక్షాల ఉమ్మడి అభ్యర్థి ఎంపికపై బుధవారం కాన్​స్టిట్యూషన్​ క్లబ్​లో సమావేశం నిర్వహించనున్నారు. దీనికి సంబంధించి 22 మంది నేతలకు ఇటీవల మమత లేఖలు రాసిన సంగతి తెలిసిందే. ఈ నేపథ్యంలోనే కాంగ్రెస్​, టీఆర్​ఎస్​, ఎన్సీపీ, డీఎంకే, సీపీఎం, సీపీఐలు సమావేశంలో పాల్గొనే తమ పార్టీల నేతల పేర్లను ప్రకటించాయి. ప్రతిపక్షాల ఉమ్మడి అభ్యర్థిగా ఎన్సీపీ చీఫ్​ శరద్​ పవార్​ను నిలబెట్టేందుకు కాంగ్రెస్​ ఇప్పటికే చర్చలు జరిపింది. ఆయన మాత్రం తాను నిలబడనని చెప్తున్నారు. మంగళవారం ఇదే విషయంపై పవార్​తో మమత భేటీ కావడం 
ప్రాధాన్యం సంతరించుకుంది.

రాష్ట్రపతి ఎన్నిక కోసం ప్రత్యేక సెల్‌‌

న్యూఢిల్లీ: రాష్ట్రపతి ఎలక్షన్​ కోసం ప్రత్యేక సెల్​ను రాజ్యసభ సెక్రటేరియట్​ ఏర్పాటు చేసింది. ఈ క్రమంలోనే ప్రత్యేక సెల్​ ఏర్పాటు చేసినట్లు సమాచారం. కాగా ఈ సెల్​కు రాజ్యసభ సెక్రటరీ జనరల్ పీసీ మోడీ నేతృత్వం వహిస్తారు. కేంద్ర ఎన్నికల సంఘం సూచనల మేరకు ఈ సెల్ ఏర్పాటు చేశారు. దీనిలో రాజ్యసభ సెక్రటేరియట్ టేబుల్ ఆఫీస్‌‌లోని దాదాపు అధికారులందరూ ఉంటారు. ఎన్నికల కోసం అసిస్టెంట్ రిటర్నింగ్ అధికారులుగా ఉన్న ముకుల్ పాండే,  సురేంద్ర కుమార్ త్రిపాఠి ఇద్దరూ కూడా ఈ సెల్‌‌లో భాగమే. నామినేషన్ పత్రాలు పార్లమెంటు హౌస్‌‌లో మాత్రమే అందుబాటులో ఉంటాయి. కాబట్టి, ఫారమ్‌‌లను అడిగేవారికి,  వారు నామినేషన్లను దాఖలు చేయడానికి సెల్ అన్ని రకాలుగా సహాయపడనుంది.