ఇరిగేషన్, ఇతర ఇన్ఫ్రాస్ట్రక్చర్ కోసం రైతులకు మరిన్ని అప్పులివ్వాల్సిందిగా కో - ఆపరేటివ్ బ్యాంకులకు కో–ఆపరేషన్, హోమ్‌ శాఖ మంత్రి అమిత్ షా సూచించారు. రైతుల ఆదాయం రెట్టింపు చేసే దిశలో కో–ఆపరేటివ్స్ డేటా బేస్ను ప్రభుత్వం తయారు చేస్తున్నట్లు వెల్లడించారు. వ్యవసాయ రంగాన్ని మెరుగుపరచకుండా, రైతుల ఆదాయం పెంచడం వీలు కాదని ఒక నేషనల్ కాన్ఫరెన్స్లో షా పేర్కొన్నారు. దేశంలోని సాగు విస్తీర్ణం పెరిగేలా కో–ఆపరేటివ్ బ్యాంకులు చొరవ తీసుకోవాలని, అందుకు తగినట్లుగా అప్పులు ఇవ్వాలని చెప్పారు. ఇండియాలో 49.4 కోట్ల ఎకరాల సాగు విస్తీర్ణం ఉందని, అమెరికా తర్వాత ఇదే ఎక్కువని పేర్కొన్నారు.
దేశంలోని సాగు భూమి మొత్తానికి ఇరిగేషన్ సదుపాయాలు కల్పిస్తే, ప్రపంచం మొత్తానికే మన దేశం ఆహారం అందించగలుగుతుందని చెప్పారు. కో–ఆపరేటివ్ బ్యాంకులు దేశంలో 90 ఏళ్ల నుంచి కార్యకలాపాలు నిర్వహిస్తున్నాయని చెబుతూ, 1924లో మొదటిసారిగా రైతులకు లాంగ్ టర్మ్ అప్పులను ఇచ్చాయని గుర్తు చేశారు. కానీ, గత 90 ఏళ్ల డేటా చూస్తే ఈ రంగంలో పెద్దగా గ్రోత్ కనబడటం లేదని పేర్కొన్నారు. దేశంలోని చాలా ప్రాంతాలలో కో–ఆపరేటివ్ బ్యాంకులు రైతులకు అప్పులివ్వడం తగ్గిపోయిందని అభిప్రాయపడ్డారు. అగ్రికల్చరల్ అండ్ రూరల్ డెవలప్మెంట్ బ్యాంకులు దేశంలోని రైతులకు 3 లక్షల ట్రాక్టర్ల కొనుగోలుకు అప్పులు ఇచ్చాయని, కానీ ఈ టార్గెట్ 8 కోట్లుగా ఉండాలని అమిత్ షా సూచించారు. 5.2 లక్షల మంది రైతులకు మీడియం, లాంగ్ టర్మ్ ఫైనాన్స్ను ఈ బ్యాంకులు అందించాయని, ఇది సరిపోదని చెప్పారు.
