ఇస్లామాబాద్ : పెషావర్ పోలీస్ లైన్ మసీదు బాంబు పేలుడు ఘటనలో పోలీసుల నిర్లక్ష్యం స్పష్టంగా కనిపిస్తున్నదని, సూసైడ్ బాంబర్ వెనుక పెద్ద నెట్వర్క్ ఉందని అక్కడి ఉన్నతాధికారులు అనుమానిస్తున్నారు. పోలీస్ డ్రెస్ వేసుకుని మసీదులోకి వచ్చాడని నిర్ధారణకొచ్చారు. ఈ ఘటనలో 101 మంది చనిపోయారని అధికారులు ముందుగా ప్రకటించారు. తర్వాత గురువారం ఈ సంఖ్యను 84కు సవరించారు. మృతుల కుటుంబ సభ్యుల్లో కొందరు హాస్పిటల్లో రెండు సార్లు రిజిస్ట్రేషన్ చేసుకోవడం కారణంగానే ఈ తప్పు జరిగిందని అధికారులు చెప్పారు. దాడికి సంబంధించిన కీలక విషయాలను ఖైబర్ పఖ్తున్‌‌ఖ్వా ఐజీ మొజ్జామ్ జా అన్సారీ గురువారం వెల్లడించారు. ‘‘హై సెక్యూరిటీ జోన్లో ఉన్న పోలీస్ లైన్లోకి సూసైడ్ బాంబర్ పోలీస్ యూనిఫాం వేసుకుని మోటార్ సైకిల్పై వచ్చాడు. హెల్మెట్, మాస్క్ పెట్టుకున్నాడు. పోలీస్ డ్రెస్ ఉండటంతో చెక్ పాయింట్ వద్ద ఉన్న సెక్యూరిటీ సిబ్బంది అతన్ని చెక్ చేయకుండానే లోపలికి పంపించారు. ఖైబర్ రోడ్ గుండా అతడు పోలీస్లైన్ ఏరియాలోకి వచ్చినట్టు సీసీ టీవీ ఫుటేజ్ ద్వారా తెలిసింది. మసీదుకు ఎలా వెళ్లాలో పాష్తూ లాంగ్వేజ్లో అక్కడే ఉన్న హవాల్దార్ను అడిగాడు. మోటార్ సైకిల్ రిజిస్ట్రేషన్ నంబర్ను ట్రేస్ చేస్తున్నాం”అని అన్సారీ తెలిపారు.
మమ్మల్ని నిందించొద్దు
పాకిస్తాన్.. తన సొంత సమస్యలను తనే పరిష్కరించుకోవాలి. మమ్మల్ని బ్లేమ్ చేయొద్దు. సూసైడ్ బాంబు జాకెట్ వల్ల రూఫ్ కూలడం 20 ఏండ్లలో ఎప్పుడూ చూడలే. దాడి ఘటనపై నిష్పక్షపాతంగా విచారణ చేయాలి. పాకిస్తాన్ ఇంటర్నల్ ప్రాబ్లమ్స్కు అఫ్గానిస్తాన్ కారణం కాదు. ఇక్కడ టెర్రరిజానికి స్థానం లేదు. పొరుగు దేశాలతో మేం శాంతిగా ఉంటున్నాం. మా దేశం టెర్రరిజానికి కేంద్రమని కొందరు అంటున్నారు. అదే నిజమైతే.. తజికిస్తాన్, ఉజ్బెకిస్తాన్, తుర్క్మెనిస్తాన్, ఇరాన్లకు కూడా టెర్రరిజం వ్యాపించేది.
–అఫ్గాన్ తాలిబన్లు
