- వరంగల్ జిల్లా బొల్లికుంటలో ఘటన
హనుమకొండ, వెలుగు: ప్రభుత్వ జాగాలో గుడిసెలు వేసుకున్నారనే కారణంతో ఆఫీసర్లు తెల్లారకముందే వచ్చి తొలగించారు. వరంగల్ జిల్లా ఖిలా వరంగల్మండలం బొల్లికుంటలోని 476, 484, 506 సర్వే నెంబర్లలో దాదాపు ఏడెకరాల ప్రభుత్వ భూమి ఉంది. ఇందులో కొద్దిరోజుల కింద వివిధ ప్రాంతాలకు చెందిన దాదాపు 2 వేల మంది పేదలు సీపీఐ ఆధ్వర్యంలో గుడిసెలు వేసుకుని ఉంటున్నారు. ప్రభుత్వం ఇండ్లు ఇవ్వకపోవడంతో గుడిసెలు వేసుకున్నామని, పట్టాలు ఇవ్వాలని కొద్దిరోజులుగా పోరాటం చేస్తున్నారు.
ఇదిలా ఉంటే మంగళవారం తెల్లవారుజామున 3 గంటల ప్రాంతంలో జీడబ్ల్యూఎంసీ డీఆర్ఎఫ్ టీం, పోలీసులు, రెవెన్యూ ఆఫీసర్లు బొల్లికుంటలోని గుడిసెలన్నింటినీ తొలగించేందుకు జేసీబీలతో వచ్చారు. వర్షం పడుతున్నా గుడిసెలు ఖాళీ చేసి వెళ్లాలని హెచ్చరించారు. ఈ టైంలో తాము ఎక్కడికి వెళ్తామని గుడిసెవాసులు ఆఫీసర్లను నిలదీశారు. దీంతో పోలీసులు బలవంతంగా ఖాళీ చేయించే ప్రయత్నం చేయగా వాగ్వాదం జరిగింది. అక్కడున్న సీపీఐ వరంగల్ జిల్లా సహాయ కార్యదర్శి షేక్ భాష్మియా, నాయకులు దండు లక్ష్మణ్, జాన్ పాల్ తో పాటు దాదాపు 600 మంది గుడిసె వాసులను అరెస్ట్ చేసి, మడికొండలోని పోలీస్ ట్రైనింగ్ సెంటర్కు తరలించారు. జనాలను ఖాళీ చేయించిన తర్వాత జేసీబీలతో గుడిసెలన్నింటినీ తొలగించారు.
మళ్లీ గుడిసెలు వేయకుండా కట్టెలన్నీ కాలబెట్టారు. అరెస్ట్ చేసిన వారందరినీ మంగళవారం సాయంత్రం రిలీజ్ చేసి ఇండ్లకు పంపించారు. విషయం తెలుసుకున్న సీపీఐ రాష్ట్ర కార్యదర్శి వర్గ సభ్యుడు తక్కళ్లపల్లి శ్రీనివాసరావు ఆధ్వర్యంలో పార్టీ నేతలు గుడిసెలు వేసుకున్న ప్రాంతానికి వచ్చి పరిశీలించారు. పోలీసులు, అధికారుల తీరుపై సీపీఐ రాష్ట్ర కార్యదర్శి చాడ వెంకటరెడ్డి సీరియస్ అయ్యారు. ఘటనపై విచారణ జరిపించి, నిరుపేదలకు ప్రత్యామ్నాయం చూపాలని సీఎం కేసీఆర్, మంత్రి ఎర్రబెల్లి దయాకర్రావు తో పాటు వరంగల్ కలెక్టర్ డా.బి.గోపీకి లెటర్ రాశారు.