మంచు విష్ణు లీడ్‌ రోల్‌‌లో నటిస్తూ, నిర్మిస్తున్న చిత్రం ‘కన్నప్ప’. మోహన్ బాబు, మోహన్ లాల్, శివ రాజ్ కుమార్, ప్రభాస్, శరత్ కుమార్ కీలకపాత్రలు పోషిస్తున్నారు. గురువారం విష్ణు బర్త్‌ డే సందర్భంగా ఈ మూవీ ఫస్ట్‌ లుక్ పోస్టర్‌‌‌‌ను విడుదల చేశారు. భారీ శివలింగం ఆకారంలో ఉన్న ప్రకృతి మధ్య, విల్లుని ఎక్కుపెట్టిన కన్నప్ప లుక్ ఆకట్టుకుంది.
ముఖేష్ కుమార్ సింగ్ డైరెక్ట్ చేస్తున్న ఈ చిత్రం న్యూజిలాండ్‌‌లో షూటింగ్ జరుగుతోంది. అక్కడే ఎనభై శాతం షూటింగ్ జరగనుంది. ‘శివుడి ప్రియ భక్తుడైన కన్నప్పను తెరపైకి తీసుకొచ్చేందుకు మా శాయశక్తులా ప్రయత్నిస్తున్నాం. ఓ దృశ్యకావ్యంలా, మునుపెన్నడూ చూడని ఓ సినిమాటిక్ ఎక్స్‌‌పీరియెన్స్ ఇచ్చేలా తెరకెక్కిస్తున్నాం’ అని మంచు విష్ణు తెలిపాడు.
