ప్రైవేట్​ బడుల్లో సొంత సిలబస్

• సర్కార్ సిలబస్ అమలు చేస్తలే
• సొంత పాఠాలతో పుస్తకాల ప్రింటింగ్​
• వాటినే కొనాలని ఆర్డర్
• తల్లిదండ్రుల నుంచి వేల రూపాయలు వసూలు
• ఫిర్యాదులు చేస్తున్నా పట్టించుకోని ప్రభుత్వం

హైదరాబాద్, వెలుగు: రాష్ర్టంలో పలు ప్రైవేటు, కార్పొరేట్ విద్యా సంస్థలు దోపిడీకి కొత్తదారులు వెతుక్కుంటున్నాయి. ఇప్పటికే ఫీజుల పేరుతో పేరెంట్స్​ను పీల్చి పిప్పిచేస్తున్న మేనేజ్మెంట్లు... పుస్తకాల పేరుతోనూ భారీగా భారం మోపుతున్నాయి. రాష్ట్ర సర్కార్ చెప్పిన సిలబస్​నే స్టూడెంట్లకు చెప్పాల్సిన మేనేజ్మెంట్లు.. సొంతంగా తయారు చేసుకున్న సిలబస్​నే పిల్లలకు బోధిస్తున్నాయి. ఆ సిలబస్ కు అనుగుణంగా బుక్స్ తయారు చేసి, వాటినే కొనాలని ఆర్డర్ వేస్తున్నాయి. ఇదంతా తెలిసినా విద్యాశాఖ అధికారులు పట్టించుకోవడం లేదు. స్టేట్ సిలబస్ స్కూళ్లు ఎస్సీఈఆర్టీ కరికులమ్, సెంట్రల్​సిలబస్ స్కూళ్లు ఎన్సీఈఆర్టీ కరికులమ్ వాడాలి. కానీ చాలా స్కూళ్లు ఈ నిబంధనను పట్టించుకోవడం లేదు. సొంతంగా తయారు చేసుకున్న సిలబస్​ను స్టూడెంట్స్​కు చెప్తున్నాయి. కొన్ని స్కూళ్లలో టెన్త్ వరకు సర్కార్ సిలబస్ చెబుతుండగా.. మిగిలిన అన్ని క్లాసులకు మాత్రం సొంత సిలబస్ నే చెబుతున్నారు. మరోవైపు సమ్మెటివ్, ఫార్మేటివ్ అసెస్​మెంట్ ఎగ్జామ్స్​కు విద్యాశాఖ నుంచి వచ్చే క్వశ్చన్ పేపర్లనే వాడాలి. కానీ వాటిని ఆయా స్కూళ్లు పెట్టడం లేదు. సొంతంగా పేపర్లు తయారు చేసి, పరీక్షలు నిర్వహిస్తున్నాయి. సిలబస్ పై మేనేజ్మెంట్లను పేరెంట్స్ నిలదీస్తే, తాము చెప్పేది.. సర్కార్ సిలబస్​ కన్నా స్టాండర్డ్ అంటూ చెప్తున్నాయి. 

రూ.700 బుక్స్ కు రూ.5 వేలు వసూలు..

వాస్తవానికి ఐదో తరగతిలోపు 4 పుస్తకాలు, ఆరు నుంచి పదో తరగతి వరకు 6 నుంచి 10 పుస్తకాలు మాత్రమే ఉంటాయి. కానీ కార్పొరేట్ స్కూళ్లలో మాత్రం15 నుంచి 18 ఉంటున్నాయి. వీటితో పాటు స్టడీ మెటీరియల్ అంటూ మరికొన్ని ఇస్తున్నాయి. వాటిని తమవద్దనే కొనాలని పేరెంట్స్​పై ఒత్తిడి చేస్తున్నాయి. ఆ పుస్తకాలు బయట ఎక్కడా దొరక్కపోవడంతో.. ఆయా స్కూళ్లలోనే కొనాల్సి వస్తోంది. ఇదే అదనుగా మేనేజ్‌మెంట్లు ఇష్టానుసారంగా పుస్తకాల రేట్లు పెంచుతున్నాయి. మార్కెట్​లో టెన్త్​ క్లాస్ పుస్తకాలన్నీ రూ.700 లోపే ఉంటాయి. కానీ కార్పొరేట్ స్కూళ్లలో మాత్రం రూ.5 వేల నుంచి రూ.7 వేల వరకు వసూలు చేస్తున్నారు. ఎల్ కేజీ, యూకేజీ పిల్లలకూ నాలుగైదు పుస్తకాలు కొనసాల్సిందేనని పేరెంట్స్​కు హుకుం జారీ చేస్తున్నారు. దీనిపై విజయ్​కుమార్ అనే ఆర్టీఐ యాక్టివిస్ట్ ఇటీవల నేషనల్ చైల్డ్ రైట్స్ కమిషన్​లో ఫిర్యాదు చేశారు. ఇదంతా తమకు తెలిసి జరుగుతున్నా పట్టించుకోని రాష్ట్ర సర్కార్.. దీనికి ఎలాంటి సమాధానం ఇస్తుందో చూడాలి.