- నిందితుని అరెస్టు చేసి.. బాలికను పేరెంట్స్కు అప్పగించిన పోలీసులు
హౌన్స్లో: లండన్లో ఓ పాకిస్తాన్ గ్రూమింగ్ గ్యాంగ్ 16 ఏండ్ల సిక్కు బాలికను కిడ్నాప్ చేసింది. ఆపై ఆమెపై లైంగిక దాడికి కూడా పాల్పడినట్టు తెలిసింది. దీంతో విషయం తెలుసుకున్న సిక్కు సమాజం సభ్యులు.. నిందితుడి ఫ్లాట్వద్దకు చేరుకున్నారు. అనంతరం పోలీసులు వచ్చి నిందితుడిని అదుపులోకి తీసుకొని.. బాలికను ఆమె తల్లిదండ్రులకు అప్పగించారు. వెస్ట్ లండన్లోని హౌన్స్లో ప్రాంతంలో ఈ ఘటన చోటుచేసుకుంది. 30 నుంచి 40 ఏండ్ల వయసున్న పాకిస్తాన్ గ్రూమింగ్ ముఠాకు చెందిన నిందితుడు.. సిక్కు బాలికకు 13 ఏండ్ల వయస్సు ఉన్నప్పటి నుంచే ఆమెతో ఫ్రెండ్షిప్ ప్రారంభించాడని తెలిసింది.
నిందితుడు సిక్కు బాలికకు 16 ఏండ్లు నిండిన తర్వాత ఆమెను తన కుటుంబం నుంచి విడదీసి.. చట్టంలోని లొసుగులను ఉపయోగించుకొని తనతో పాటు ఫ్లాట్లో ఉంచుకుంటున్నాడని తెలిసింది. దీంతో తొలుత పోలీసులు కూడా బాధిత కుటుంబానికి సహాయం చేయలేకపోయారు. అయితే, సిక్కు కమ్యూనిటీ గ్రూపులు ఆమెను రక్షించడానికి రంగంలోకి దిగాయి. సుమారు 200 మంది నిందితుడి ఫ్లాట్వద్దకు వెళ్లి పెద్ద ఎత్తున ఆందోళన చేశారు. ఆ తర్వాత పోలీసులు అక్కడికి చేరుకొని ఆ బాలికను తిరిగి తన కుటుంబానికి అప్పగించారు.
