చావు దెబ్బ తిన్న బుద్ధి మారలే: మరో భారీ కుట్రకు తెరలేపిన జైషే మహ్మద్

ఇస్లామాబాద్: పహల్గాం ఉగ్రదాడికి కౌంటర్‎గా భారత్ చేపట్టిన ఆపరేషన్ సిందూర్‎తో జైష్-ఎ-మొహమ్మద్ ఉగ్రవాద సంస్థ చావు దెబ్బ తిన్నది. పాకిస్తాన్‎లోకి చొచ్చుకెళ్లి మరీ బహవల్‌పూర్‌‎లో ఉన్న జైష్-ఎ-మొహమ్మద్ ప్రధాన కార్యాలయం సుభాన్ అల్లా క్లాంపెక్స్ భవనంపై భారత సైన్యం మెరుపు దాడి చేసింది. ఈ దాడిలో సుభాన్ అల్లా కాంప్లెక్స్ నామారూపాల్లేకుండా పోవడమే కాకుండా.. జైష్-ఎ-మొహమ్మద్ చీఫ్ మసూద్ అజర్ ఫ్యామిలీలో దాదాపు 10 మంది హతమయ్యారు. 

అయితే.. భారత్ చేతిలో చావు దెబ్బ తిన్నా కూడా జైష్-ఎ-మొహమ్మద్ బుద్ధి మారలేదు. ఆపరేషన్ సిందూర్ దెబ్బకు నాలుగైదు నెలలపాటు కార్యకలాపాలు నిలిపేసిన జైష్-ఎ-మొహమ్మద్ మళ్లీ యాక్టివ్ అయ్యేందుకు ప్రయత్నిస్తుంది. అయితే.. జైషే మహ్మద్ ఉగ్రవాద సంస్థ ఈ సారి మరో కొత్త కుట్రకు తెరలేపుతున్నట్లు భారత ఇంటలిజెన్స్ వర్గాలు గుర్తించాయి. గ్రూప్ నెట్ వర్క్ విస్తరణలో భాగంగా.. జేషే తొలిసారి ప్రత్యేకంగా మహిళలతో కూడిన ఉగ్రవాద దళం కోసం జమాత్ ఉల్-ముమినాత్ పేరుతో మహిళా బ్రిగేడ్‎ను ఏర్పాటు చేస్తున్నట్లు ఇంటలిజెన్స్‎ ఫైండ్‎ఔట్ చేసింది. 

ఈ మహిళా బ్రిగేడ్ కోసం వ్యక్తులను నియమించుకోవడానికి, నిధులను సేకరించడానికి 'తుఫత్ అల్-ముమినాత్' అనే ఆన్‌లైన్ శిక్షణా కోర్సును కూడా ప్రారంభించనున్నట్లు తెలిసింది. 2025, నవంబర్ 8 నుంచి ఆన్ లైన్ కోర్సు ప్రారంభం కానుందని.. ఇందులో భాగంగా ప్రతిరోజు 40 నిమిషాల పాటు మహిళా బ్రిగేడ్లకు పాఠాలు బోధించనున్నట్లు నిఘా వర్గాలు గుర్తించాయి.

►ALSO READ | ఇజ్రాయెల్ లో జేడీ వాన్స్ పర్యటన

 మసూద్ అజార్‌తో పాటు ఆయన సోదరీమణులు సాదియా అజార్, సమైరా అజార్, జేషే టాప్ కమాండర్స్ మహిళా బ్రిగేడ్లకు క్లాసులు చెప్పనున్నారు. తుఫత్ అల్-ముమినాత్ ఆన్ లైన్ కోర్సులో చేరే ప్రతి మహిళ సంస్థకు రూ.500 (పాకిస్తానీ రూపాయలు) విరాళం ఇవ్వడంతో పాటు ఆన్‌లైన్ ఫారమ్‌ను నింపమని జేషే డిమాండ్ చేసినట్లు సమాచారం. ఈ మహిళా ఉగ్రవాద దళంలోకి తీవ్రవాదుల భార్యలు, పేద మహిళలే లక్ష్యంగా రిక్రూట్ చేసుకోవాలని జేషే ప్లాన్ చేస్తోన్నట్లు నిఘా వర్గాలు గుర్తించాయి. 

మహిళా బ్రిగేడ్‎ గ్రూప్ బాధ్యతలను మసూద్ అజర్ తన చెల్లెలు సాదియా, సమైరా చేతిలో పెట్టినట్లు సమాచారం. సాదియా భర్త యూసప్ అజార్, సమైరా భర్త ఉమర్ ఫరూక్ ఇద్దరూ కూడా ఉగ్రవాదులే. పుల్వామా ఉగ్రదాడి కుట్రదారుడే ఈ ఉమర్ ఫరూక్. వీరిద్దరూ భారత సైన్యం చేతిలోనే హతం కావడం గమనార్హం. ఆపరేషన్  సిందూర్‎లో యూసప్, ఇండియన్ ఆర్మీ ఎన్ కౌంటర్లో ఉమర్ ఫరూక్ కుక్క చావు చచ్చారు. ఆత్మాహుతి దాడులు నిర్వహించడమే లక్ష్యంగా జైషే ఈ మహిళా బిగ్రేడ్ ను ఏర్పాటు చేస్తోన్నట్లు గుర్తించిన నిఘా వర్గాలు ఈ మేరకు అప్రమత్తమయ్యాయి.