భద్రాచలం, సారపాకలో ఎట్టకేలకు ఓట్ల పండుగ.. టౌన్ షిప్, మున్సిపాలిటీ, కోర్టులు, వాదనలతో చిక్కులు

• ఈసారి  పంచాయతీ ఎన్నికలతో లీడర్ల నామినేషన్ల హడావుడి 
• భద్రాచలం మేజర్​పంచాయతీలో త్రిముఖ పోటీ ఖాయం.. 

భద్రాచలం, వెలుగు : భద్రాచలం, సారపాక గ్రామపంచాయతీల్లో ఎట్టకేలకు  ఓట్ల పండగ జరుగుతోంది. డిసెంబరు 11న తొలివిడతలో ఇక్కడ ఎన్నికలు జరగనున్నాయి. భద్రాచలం పంచాయతీలో 20 వార్డులు, 40,761 మంది ఓటర్లు ఉన్నారు. ఎన్నికలకు 60 పోలింగ్​ కేంద్రాలను సిద్ధం చేస్తున్నారు. ఇప్పటి వరకు సర్పంచ్​కు రెండు, వార్డు మెంబర్లకు 28 నామినేషన్లు దాఖలయ్యాయి. సుదీర్ఘకాలం తర్వాత జరుగుతున్న ఎన్నికల నేపథ్యంలో శ్రీరామదివ్యక్షేత్రంలో రాజకీయ కోలాహలం నెలకొంది. 

1987 నుంచి చిక్కులే... 

భద్రాచలం మేజర్​ గ్రామపంచాయతీలో ఎన్నికలకు 1987 నుంచి న్యాయపరమైన చిక్కులే ఎదురవుతున్నాయి. చాలా కాలం తర్వాత 2001లో టౌన్​ షిప్​ చేశారు. ఆ ముచ్చట ఐదేళ్లే. తర్వాత మున్సిపాలిటీని చేశారు. దీనిపైనా కోర్టులు, వాదనలతో నానా రగడ జరిగింది. 2013లో పంచాయతీగా మార్చి ఎన్నికలు పెట్టగా భూక్యా శ్వేత సర్పంచ్​గా గెలిచారు. ఆమె పదవీ కాలం 2018లో ముగిశాక మళ్లీ ఎన్నికలే జరపలేదు. 

నానారకాల ప్రయోగాలు చేశారు. మూడు పంచాయతీల తతంగం నడిచింది. దీన్ని రాజకీయ పార్టీలు తీవ్రంగా వ్యతిరేకించడంతో కొత్తగా వచ్చిన కాంగ్రెస్​ సర్కారు ఈ పంచాయితీకి చెక్​ పెట్టింది. మేజర్​ గ్రామపంచాయతీకి ఎన్నికలు నిర్వహించాలని నిర్ణయించడంతో ఎట్టకేలకు ఎన్నికలకు లైన్​క్లియర్ ​అయ్యింది. 

సారపాకలోనూ అంతే...!

సారపాకలోనూ భద్రాచలం పరిస్థితే ఏర్పడింది. ఈ మేజర్​పంచాయతీని సారపాక, తాళ్లగొమ్మూరు, కోయగూడెం పంచాయతీలుగా విభజించారు. సారపాకను మున్సిపాలిటీ చేసేందుకు బీఆర్​ఎస్​ సర్కారు ప్రయత్నించింది. 

ఈ నిర్ణయాన్ని స్థానిక రాజకీయ పార్టీలు వ్యతిరేకించాయి. దీనితో ప్రయత్నాన్ని విరమించుకున్నారు. కానీ తాళ్లగొమ్మూరు, కోయగూడెం పంచాయతీలకు మాత్రం ఎన్నికలు జరిగాయి. ఇప్పుడు సారపాకకు కూడా పంచాయతీ ఎన్నికలు జరుగుతుండటంతో పార్టీలు పోరును ఉధృతం చేశాయి. నామినేషన్ల పర్వం కొనసాగుతోంది. ఇక్కడ 18,934 మంది ఓటర్లు ఉన్నారు.

భద్రాచలంలో త్రిముఖ పోటీ!

భద్రాచలం మేజర్​ గ్రామపంచాయతీలో ఈసారి త్రిముఖ పోటీ జరగనుంది. బీఆర్​ఎస్, సీపీఎం, గోండ్వాన దండకారణ్య పార్టీల నుంచి మానె రామకృష్ణ, కాంగ్రెస్, గిరిజన సంఘాల మద్దతుతో పూనెం కృష్ణ దొర, టీడీపీ, జనసేన, బీజేపీలతో కూడిన మహాకూటమి నుంచి హరిశ్చంద్రనాయక్​ బరిలోకి దిగుతున్నారు. 

ఇప్పటికే మానె రామకృష్ణ, పూనెం కృష్ణ దొరలు నామినేషన్లు దాఖలు చేశారు. ఇక మాజీ సర్పంచ్​భూక్యా శ్వేత కూడా ఇండిపెండెంట్​గా నామినేషన్​ వేయడానికి సిద్ధమవుతున్నారు. మినీ అసెంబ్లీగా భావించే భద్రాచలం మేజర్​గ్రామపంచాయతీ ఎన్నికలను రాజకీయపార్టీలు ప్రతిష్టాత్మకంగా తీసుకున్నాయి.