జయశంకర్భూపాలపల్లి, వెలుగు: పంచాయతీ ఎన్నికల నిర్వహణలో మైక్రో అబ్జర్వర్ల పాత్ర కీలకమని పంచాయతీ ఎన్నికల సాధారణ పరిశీలకులు ఫణీంద్రారెడ్డి పేర్కొన్నారు. సోమవారం జయశంకర్భూపాలపల్లి జిల్లా కేంద్రంలో ఏర్పాటు చేసిన శిక్షణా శిబిరంలో ఫణీంద్రారెడ్డి మాట్లాడారు. జిల్లాలో ఫ్రీ అండ్ ఫెయిర్ ఎన్నికల నిర్వహణలో సూక్ష్మ పరిశీలకులు విధులు ముఖ్యమైనవన్నారు. పోలింగ్ కేంద్రాల్లోని ప్రతి చర్యను నిశితంగా పరిశీలించాలని, ఏ పరిస్థితుల్లోనూ పోలింగ్ నిర్వహణలో జోక్యం చేసుకోకూడదని సూచించారు.
అనుమానాస్పద పరిస్థితులు గమనిస్తే వెంటనే ఉన్నతాధికారులకు నివేదించాలని మైక్రో అబ్జర్వర్లకు సూచించారు. అనంతరం జిల్లా ఎన్నికల అధికారి, కలెక్టర్ రాహుల్ శర్మ మాట్లాడుతూ ఎన్నికల ప్రక్రియను పూర్తిగా పారదర్శకంగా నిర్వహించడంలో మైక్రో అబ్జర్వర్ల పాత్ర అత్యంత ముఖ్యమని చెప్పారు. 52 మంది సూక్ష్మ పరిశీలకులు ఎన్నికల్లో విధులు నిర్వహిస్తున్నారన్నారు. సమావేశంలో అడిషనల్ కలెక్టర్ విజయలక్ష్మి, వ్యయ పరిశీలకులు రవి, డీపీవో శ్రీలత, ఎల్డీఎం తిరుపతి, డీఈవో రాజేందర్, మాస్టర్ ట్రైనర్లు రామయ్య, తిరుపతి పాల్గొన్నారు.
